අපිළිවෙල අල්මාරියක් ඔබේ මනස අවුල් කරනවා විතරක් නෙමෙයි හදිස්සියකට ඇඳුමක් හොයාගන්න ගියාම ඔබේ කාලයත් අපතේ යවනවා. ඔබව අවශ්‍ය වෙලාවට අවශ්‍ය ඇඳුම් ඉක්මනට අතට ගන්න පුළුවන් විදිහට අල්මාරියක් පවත්වාගෙන යන්නෙ කොහොමද? ඇත්තටම ඒක හරිම ලේසි දෙයක්.
මුලින්ම ඔබේ අල්මාරිය පිරිසිදු කරගන්න
අල්මාරිය නිවැරදිව සැලසුම් කරගන්න කලින් ඔබ ඔබේ අල්මාරිය පිරිසිදු කරගන්න අවශ්‍ය වෙනවා. ඇඳුම් සහ අනෙක් සියල්ලම අල්මාරියෙන් එළියට අරගෙන එහි ඇති ලාච්චු, තට්ටු සියල්ල තෙත රෙදි කැබැල්ලකින් පිරිසිදු කරගන්න. ඊට පස්සෙ ඔබට කපුරු වැනි සුවඳ ද්‍රව්‍යයක් භාවිත කරන්න පුළුවන් අල්මාරිය කෘමීන්ගෙන් ආරක්ෂා කරගන්න.
අල්මාරියේ පිරුණු අනවශ්‍ය ඇඳුම්
ඔබට දැන් අඳින්න බැරි ඇඳුම් කවදා හෝ නැවත අඳින්න හිතාගෙන ඇඳුම් ගබඩා කරගෙන ඉන්නවද? ඇත්තටම ඒක නිෂ්ඵල ක්‍රියාවක්. ඒ නිසා ඔබ ඔබේ අල්මාරියේ පිරුණු අනවශ්‍ය ඇඳුම් ඉවත් කරන්න.
ඇඳුම් වර්ග කරන්න
ඔබට අවශ්‍ය වෙලාවට හොයාගන්න ලේසි වෙන විදියට අල්මාරිය සැලසුම් කරන්න නම් ඔබේ ඇඳුම් එක ගොඩේ අසුරලා හරියන්නෙ නම් නෑ. ඔබ ඔබේ ඇඳුම් වර්ග කරන්න ඕන.
කොහොමද ඇඳුම් වර්ග කරන්නේ?
ඔබ නිතර අඳින ඇඳුම්
ඔබ නිවසට අඳින ඇඳුම් අල්මාරියේ ඔබේ ඇස් මට්ටමේ ඇති තට්ටුවෙන් පිළිවෙලට නවා තබන්න. එහිදී කොට කලිසම්, ටීෂර්ට්, සාය වෙන වෙනම තබන්න.
කාර්යාලයට අඳින ඇඳුම්
ගෙදරට අඳින ඇඳුම් තට්ටුවට උඩින් කාර්යාලයට අඳින ඇඳුම් තවත් තට්ටුවක අසුරන්න. නැති නම් එල්ලා තබන්න. මතක තබාගන්න මේවාත් ඔබට පහසුවෙන් ගත හැකි තට්ටුවකයි අසුරන්න ඕන. ඒ වගේම ඔබ කාර්යාලයට සාරි අඳිනවා නම් එක් එක් සාරියේ හැට්ටය සමග ඒවා එල්ලා තැබීමත් ඔබට කරන්න පුළුවන්.
ව්‍යායාම කරන ඇඳුම්
ඔබ ව්‍යායාම සඳහා භාවිත කරන ඇඳුම් විශාල ප්‍රමාණයක් නොමැති නිසා ඒවා කුඩා තට්ටුවක අසුරන්න.
උත්සව සඳහා අඳින ඇඳුම්
විශේෂ අවස්ථාවන් සඳහා අඳින ඇඳුම් වෙනම එල්ලා තැබීම වඩාත් සුදුසුයි.
යට ඇඳුම්
යට ඇඳුම්වලට ලොකු ඉඩ ප්‍රමාණයක් නොයන නිසා ඒවා අල්මාරියේ ඇති තරමක ලොකු ලාච්චුවක පිළිවෙලට අසුරන්න ඔබට පුළුවන්.
තුවා සහ ඇඳ ඇතිරිලි
මේවා දිනපතා පාවිච්චි නොවෙන නිසා අල්මාරියේ උඩ තට්ටුවල අසුරන්න ඔබට පුළුවන්. ලොකු තුවා සිට කුඩා තුවා දක්වා එක උඩ එකත්, ඇඳ ඇතිරිලි වෙනමත් ඊට සමීපයෙන් ඒවායේ කොට්ට උරත් ඇසිරීමෙන් ඔබට අවශ්‍ය වෙලාවට ඒවා පහසුවෙන් හොයාගන්න පුළුවන්.
මේ විදියට ඔබට ඇති හැම ඇඳුමක්ම වර්ග කරගන්න ඔබට පුළුවන්. ඒක ඔබට ලොකු පහසුවක්. අපි පුරුදු වෙලා ඉන්නෙ සාමාන්‍යයෙන් ඇඳුම් නවලා තියන්න හැබැයි ඊට වඩා වෙනස් ක්‍රමවලටත් අපිට අපේ ඇඳුම් අසුරන්න පුළුවන්. එතකොට කොහොමද මේ හැම ඇඳුමක්ම අල්මාරියේ අසුරන්නේ? ඒ ගැනත් අපි කතා කරමු.
ඔබේ අල්මාරියෙ ඇති ඉඩෙන් උපරිම ප්‍රයෝජන ගන්නේ කොහොමද?
ලාච්චු කිහිපයක් එකතු කරන්න
ඔබට අල්මාරියේ වැඩි ඉඩක් අවශ්‍යද? එහෙනම් ඒ සඳහා ලාච්චු කට්ටලයක් භාවිත කරන්න ඔබට පුළුවන්. මේ සඳහා දැල් කූඩ භාවිත කිරීමෙන් ඔබේ ලාච්චුවල ඇතුළත දැකීම සහ ඔබ සොයන දේ හරියටම සොයා ගැනීම පහසු කරනවා.
ඇඳුම් බෙදුම් ටැග් ඇතුළු කරන්න
විවිධ වර්ගයේ ඇඳුම් පහසුවෙන් වර්ග කිරීමට හැන්ගර් ටැග්ස් ඔබට භාවිත කර ඔබ හොයන ඇඳුම ඉක්මනට ඔබට හොයාගන්න පුළුවන්.
ඔබේ අල්මාරියේ ඉඩ දෙගුණ කරගන්න
ඔබ එල්ලා තබන ඇඳුම් යට අමතර ඉඩක් තියනවා නම් ඒ ඇඳුම්වලට යටින් තවත් ඇඳුම් එල්ලනයක් සවි කරන්න. එවිට අල්මාරියේ ඉඩ දෙගුණ කරගෙන තවත් ඇඳුම් එල්ලන්න ඔබට පුළුවන්.
සියල්ල ලේබල් කරන්න
සෑම දෙයකටම ලේබල් එකතු කිරීමෙන් ඔබේ අල්මාරියේ ඇති සියලුම බඳුන්. පෙට්ටි හෝ කූඩවල ඇති දේවල් පහසුවෙන් හොයාගන්න පුළුවන්.
කුඩා දේවල්වලට කුඩා ඉඩක් දෙන්න
කුඩා උපාංග සහ යට ඇඳුම් අල්මාරියේ ලාච්චුවල අසුරන්න. නැතිනම් එල්ලා තැබූ ඇඳුම් යට ඉඩක් ඇත්නම් කුඩා පෙට්ටි හෝ කූඩ තබා ඒවා අසුරන්නත් පුළුවන්.
උපාංග පෙනෙන සේ එල්ලා තබන්න
අල්මාරියේ දොරේ පිටුපස බෙල්ට්, පසුම්බි, ස්වර්ණාභරණ, ස්කාෆ් හෝ වෙනත් උපාංග කුඩා කොකු මඟින් එල්ලා තබන්න පුළුවන්.
ඇඳුම් පරිස්සමින් නමා ගන්න
පිළිවෙලට නැවුනු ඇඳුම්වලින් පිළිවෙල අල්මාරියක් ආරම්භ වෙනවා. ඔබ එල්ලා තබන්නේ නැති ඇඳුම් නිසිලෙස නැවීමට මතක තබාගන්න. ඔබ ඒවා වැඩිපුර පිළිවෙලට තබා ගැනීමට බලාපොරොත්තු වන්නේ නම් ප්ලාස්ටික් රෙදි නවන ෆෝල්ඩර භාවිත කරන්න පුළුවන්.
තිර රෙදි එල්ලා තබන්න
අල්මාරියේ දොරවල් නොමැති නම් තිර රෙදි දෙකක් එල්ලා තැබීමෙන් ඇතුළත දේවල් ඉවතට නොපෙනී තබා ගන්න පුළුවන්. අල්මාරිය අධික ලෙස පිරී තියෙනවා නම් දොරකට වඩා තිර රෙදි තිබීම ඔබට පහසුවක්.
ඔබ අඳින්නේ නැති දේ පරිත්‍යාග කරන්න
අල්මාරියේ ඉඩ නිදහස් කිරීමට ඇති පහසුම හා හොඳම ක්‍රමය මෙයයි. ඔබ තවදුරටත් අඳින්නේ නැති හෝ අවශ්‍ය නොවන දේ ඉවත් කර එය ප්‍රයෝජනවත් වන කෙනෙකුට පරිත්‍යාග කරන්න.මේ විදියට ඔබේ අල්මාරිය ලස්සනට සහ ක්‍රමවත්ව සැලසුම් කරගන්න ඔබට දැන් පුළුවන්. හදිස්සියකට ඇඳුම් හොයාගන්න ඔබේ වටිනා කාලය අපතේ යවන්න දැන් ඔබට අවශ්‍ය වෙන්නෙ නෑ.
අර්චිත ඉඳුවර ✍️
