ශරීරයේ අනවශ්‍ය රෝම ඉවත් කරගන්න පුළුවන් ක්‍රම කීපයක් තියෙනවා. ඒ වගේම මේ එක එක ක්‍රමවල හොඳ වගේම නරක ප්‍රතිඵලත් තියෙනව. අපි දැකලා තියෙනවා සමහර කාන්තාවන්ගේ රෝම කූප වැවෙන්නේ හරිම අවලස්සන විදිහට. ශරීරයේ අධික රෝම ඇතිවීම රෝග තත්ත්වයක් නිසා වෙන්නත් පුළුවන්. අසාමාන්‍ය විදිහට ඔබේ ශරීරයේ රෝම වර්ධනය වෙනවනම් වෛද්‍ය උපදෙස් ලබා ගැනීම වඩාත් සුදුසුයි. එතකොට පුළුවන් කිසියම් රෝග තත්ත්වයක් නිසාද නැතිනම් ස්වභාවික සංසිද්ධියක් නිසාද අධිකව රෝම වර්ධනය වෙන්නේ කියලා අපිට දැනගන්න.
Shaving
ඉස්සර ඉඳන්ම අනවශ්‍ය රෝම ඉවත් කරන්න තියෙන ජනප්‍රියම ක්‍රමය තමයි ෂේවින් කියන්නේ. ඒ කියන්නේ රේසර් එකක් ආධාරයෙන් රෝම ඉවත් කිරීම. මේ ක්‍රමයෙදි රෝම කූපය ඉවත් වෙන්නේ සම මතුපිටින්. ඒ නිසා නැවත රෝම වර්ධනය වෙනකොට එය හොඳින් දිස්වෙනවා. ඒ නිසා බොහෝ දෙනෙක් මේ ක්‍රමයට එතරම් කැමැත්තක් දක්වන්නෙ නෑ.
මේකේ තියෙන වාසි තමයි ඉතා පහසුවෙන්, මුදල් වැය වීමකින් තොරව තමන්ටම කරගන්න පුළුවන් වීම.ඔබ ෂේව් කරන කෙනෙක් නම් සමේ තෙතමනය තියෙනකොට ෂේවින් ක්‍රීම් එකක් හරි බොඩි වොෂ් එකක් හරි ආලේප කරලා රෝම කූප වැවිලා තියෙන දිශාවටම ඉවත් කිරීම කරන්න ඕනේ.
Waxing
මේ ක්‍රමයට තමයි වර්තමානයේ බොහෝ කාන්තාවන් ඇලුම් කරන්නේ. Hot wax,Cool wax, Natural wax වගේ වැක්ස් වර්ග කිහිපයක් තියෙනවා. වැක්ස් කරන එකේ තියෙන වාසි තමයි විශාල ප්‍රදේශයක තියෙන රෝම සඳහා වැක්ස් භාවිත කරන්න පුළුවන්. ඒ වගේම මාසෙකට, මාස දෙකකට වතාවක් කිරීම ප්‍රමාණවත්.
වැක්ස් කරන එකේ තවත් වාසියක් තමයි රෝම කූපය මුලින්ම ඉවත් වෙලා යන නිසා අලුතින් කෙස් ගස වැවෙන්නේ ඉතාම සෙමින්. ඒ වගේම මැරුණ සමත් හොඳින් ඉවත් වෙනවා. වැක්ස් එකක් ගාන්න ඕන රෝම කූප වැවෙන දිශාවට. ඊට පස්සේ වැක්ස් එක උඩින් වැක්ස් ස්ට්‍රිප් එකක් හෝ කපුරෙදි කැබැල්ලක් අලවලා විරුද්ධ පැත්තට අදින්න ඕන.
මේකෙ තියෙන ප්‍රධානම අවාසිය තමයි මේ ක්‍රමය ටිකක් වේදනා සහිතයි. ඒ නිසාම සමහරු වැක්ස් කරන්න අකමැතියි. ඒ වගේම හොට් වැක්ස් එකේ රස්නේ ටිකක් වැඩි වුණොත් හම පිච්චෙන්න පුළුවන්. ඒ නිසා හොට් වැක්ස් පාවිච්චි කරන අය උෂ්ණත්වය ගැන සැලැකිලිමත් වෙන්න ඕනෙ. සමහර අයට වැක්ස් කළාට පස්සෙ සම රතු වීම, බිබිලි ඇති වීම වෙන්න පුළුවන්.
අපි කඩෙන් ගන්න වැක්ස් එකක් නම් විවිධ රසායනික ද්‍රව්‍ය අඩංගු වෙනවා. රසායනික ද්‍රව්‍ය නිසා ඇතැම් අයට ආසාත්මිකතා ඇතිවෙන්නත් පුළුවන්. සැලුන් එකකට ගිහින් අපි වැක්ස් එකක් කරගන්නවනම් එකම ලී පතුරකින් එකම වැක්ස් ප්‍රමාණය කිහිපදෙනෙක්ට ආලේප කරනවනම් කෙනෙක්ගෙ විෂබීජ තවත් කෙනෙක්ට පැතිරිලා යාමේ අවදානමක් තියෙනවා.
Natural wax
මේ ස්වභාවික වැක්ස් එක අපි හදාගන්නේ සීනි සහ දෙහි පාවිච්චි කරලා. ගෙදරදිම හදාගන්න පුළුවන් ලාබදායී දෙයක්. කිසිම රසායනික ද්‍රව්‍යක් අඩංගු නැති නිසා මේක සමට ඉතා හිතකරයි. මාස දෙකකට වතාවක් කිරීම ප්‍රමාණවත්.
Hair Removing Cream
මේකත් ගොඩක් තරුණියන් කැමතිම ක්‍රමයක්. මේක තමන්ටම පහසුවෙන් ගෙදරදිම කරගන්න පුළුවන් වගේම වේදනාවකින් තොරයි. නමුත් මෙතනදි සිද්ධ වෙන්නේ ක්‍රීම් එක ආලේප කළාට පස්සේ කෙස් ගස කැඩිලා යන එක. ඒ නිසා නැවත කෙස් ගස වර්ධනය වෙනකොට තරමක් ගොරෝසුවට තමයි වැවෙන්නෙ.
හෙයා රිමුවින් ක්‍රීම් ගාන එකේ තියෙන අවාසි තමයි මේ ක්‍රීම් වලට විවිධ රසායන ද්‍රව්‍ය භාවිත කරන නිසා සමහරුන්ගේ සමට අහිතකර වෙන්න පුළුවන්. ඉතින් ගෑනු ළමයින්ට නිතරම ප්‍රයෝජනවත් මේ අනවශ්‍ය රෝම ඉවත් කරන ක්‍රම හරිම විදිහට දැනගෙන කරන්න.
රූපලාවන්‍ය ශිල්පිණී
මාෂි නෙහන්සා
(Brisbella)
එරංදි කෞශල්‍යා ✍️
