Miss International 2024

මෙවර මොඩ්ල් සර්ච් ඉන්ටර්නැෂනල් යටතේ මිස් ඉන්ටර්නැෂනල් 2024 ටයිට්ල් එක දිනාගත්තෙ තිළිණි කුමාරි. නිරූපණ ක්ෂේත්‍රයේ නියැලුණත් අධ්‍යාපනය පැත්තෙනුත් යන්න පුළුවන් ඉහළම දුරකට ගිහින් තිබීම ඇගේ විශේෂම දෙයක්. අද කතාව ඇයත් සමග…

තිළිණි මුලින්ම කියන්නකො ඔයාගෙ විස්තර ටිකක්…

මගෙ නම තිළිණි කුමාරි ශෙහාරා. ගොඩක් අය කියන්නෙ ටිනී කියලා. මගේ ගම පිළිමතලාව. නමුත් කොළඹ තමයි රැකියාව කරන්නෙ. මට ඉන්නෙ අම්මයි මල්ලියි. මේ වෙද්දි මම විශ්වවිද්‍යාලයක කථිකාචාර්යවරියක් විදිහට වැඩ කරනවා. ඒ විශ්වවිද්‍යාලයේම කළමනාකාර තනතුරු දෙකක් මට හිමියි.

මොකද්ද ඔබ ජයග්‍රහණය කළ පැජන්ට් එක?

මොඩ්ල් සර්ච් ඉන්ටර්නැෂනල් යටතේ මිස් ඉන්ටර්නැෂනල් 2024 තමයි මට ලැබුණු ජයග්‍රහණය. රටවල් විස්සකට අධික ප්‍රමාණයක් මේ තරගයට සහභාගි වුණා. අවසන් වටයට තරගකරුවන් 18 ක් තේරීපත් වුණා. Ms සහ Mrs දෙඅංශයම එකට තරග වැදුණේ. මේක තමයි අභියෝගාත්මකම දේ වුණේ මට.

කොහෙද තරගාවලිය පැවැත්වුණේ?

මේ පැජන්ට් එක තිබුණෙ ඉන්දුනීසියාවේ.

මේ වෙද්දිත් ඔබ නිරූපණ ක්ෂේත්‍රයේ නියැලෙනවද?

ඔව්. මේ වෙද්දිත් මම නිරූපණ ක්ෂේත්‍රයේ ඉන්නවා. මම මිස් ටුවරිස්ම් වර්ල්ඩ් ශ්‍රී ලංකා 2022 ජයග්‍රාහිකාව බවටත් පත් වුණා. එදා ඉඳලා මේ දක්වාම මම රුක්මල් සේනානායක සර් යටතේ නිරූපණය හදාරනවා. විශේෂයෙන්ම මම මතක් කරන්න ඕනෙ මේ පැජන්ට් එකට මාව නොමිනේට් කළේ මගේ නැෂනල් ඩිරෙක්ටර් නිර්මාල් බණ්ඩාර සහ කොරියොග්‍රැෆර් රොසෑන් ඩයස්.

තිළිණිගෙ අනාගත බලාපොරොත්තු මොනවද?

මං මේ වෙද්දි අධ්‍යාපනයෙන් ඉදිරියෙන්ම ඉන්න නිසා උගත් දෙයින් සමාජයේ දරුවන්ට තවත් දේවල් කරන්න බලාපොරොත්තු වෙනවා. ඒ වගේම රංගනයෙන් වගේම නිරූපණයෙන් තවත් ඉදිරියට යන්න බලාපොරොත්තු වෙනවා. භාත්ඛණ්ඩේ සංගීත් විශාරද විභාගය කරන නිසා ගායන අංශයෙනුත් යමක් කරන්න බලාපොරොත්තුවක් තියෙනවා. තරගය නිසා මගහැරුණු නිවේදන කටයුතුත් නැවත කරගෙන යනවා.

ඇයි මේ ක්ෂේත්‍රයට එන්න කැමැත්තක් ඇති වුණේ?

ඉගෙනීමට අමතරව ඇති දක්ෂතාවලින් ප්‍රයෝජන ගන්න ඕන වුණ නිසා. මට ආසාවක් තිබුණා තවදුරටත් මාව වර්ධනය කරගෙන ඉදිරියට යන්න.

එරංදි කෞශල්‍යා ✍️