තවත් දින කිහිපයකින් අසිරිමත් නත්තල ලොවට උදාවෙයි. කිතුනුවන්ගේ නත්තලේ ඇති සුවිශේෂීත්වය වන්නේ ලෝකවාසී කිතුනු බැතිමතුන් පමණක් නොව අන්‍ය ආගමික ජනතාවත් අනාරාධිතවම නත්තලේ අසිරිය විඳගැනීමට ලොවපුරා එකතුවීමයි.
මිනිසා අඳුරෙන් ආලෝකයට රැගෙන යෑමේ හැකියාවක් ඕනෑම ආගමකින් හෝ දර්ශනයකින් සිදුවන බව ලොවම පිළිගන්නා අතර ඒ සඳහා ජේසුස් ක්‍රිස්තුස් වහන්සේගේ දේශනාවන් මනා අධ්‍යයනයකදී පෙනී යන්නේ ලෝකවාසී සියලු ජනතාවගේ හිතසුව පිණිස ආදරය, දයාව, කරුණාව සහ එකිනෙකාට උදව් කරගැනීම වැනි මානුෂීය ගුණාංග පදනම් කරගත් යාථාර්තවාදී දේශනාවන්වලින් පොහොසත් වී ඇති බවය. නමුත් අද වනවිට උන්වහන්සේගේ සැබෑ දේශනාවෙන් ගව් ගානක් ඔබ්බට නත්තල ගමන් කර තිබීම කණගාටුවක්මය.
ඉතිහාසයේ සඳහන් වන පරිදි ක්‍රිස්තුස් වහන්සේගේ උපත ක්‍රි.පූ. 4 හෝ 3 වැනි සියවසේ මුල් භාගයේදී සිදුවූ බව සැළකේ. එහිදී කිතු උපත සැමරීමක් සිදුකර නොමැත. එකළ රෝම නීතිය අනුව උපත සැමරීම වරදකි.
කිතු දහම වැළදගත් රෝම අධිරාජ්‍යයා එතෙක් දෙසැම්බර් 25 වන දින යෙදී තිබූ රෝමවරුන්ගේ හිරු පිදීමේ උත්සවය කිතු උපත සැමරුමට යොදා ගන්නා ලෙස අණ කළ බවට පසුව සාක්ෂි ලැබී ඇත.
ඊට සමගාමීව එදා සිට අද දක්වා දෙසැම්බර් 25 වැනිදා කිතු උපත සමරමින් නොයෙක් අංගෝපාංග එක් වෙමින් නත්තල අසිරිමත්ව සමරන ආගමික උත්සවයක් බවට ලොව පුරා ව්‍යාප්තව ඇත. සැබවින්ම මෙය දේව සැණකෙලියක් නොවිය යුතුමය.
අද වනවිට කිතුනු පල්ලියක සහ නිවසක ඉදිරියේ සංකේතාත්මකව සැරසෙන කිතු උපත සිහි කරන ගවලෙනට අමතරව නත්තල් ගස, නත්තල් සැරසිලි නිසාම ලෝකයේ දිළිඳු ජනතාව පීඩා විඳී.
අපේ රටේද පවතින ආර්ථික අර්බුදය හමුවේ කුසට වේලක් හැර වේලක් හෝ අහරක් ගන්නටවත් නොහැකිව සිටින කල නත්තල් සැරසිලිවලට යම් කිසි මුදලක් හෝ ඔවුන් වියදම් කරන්නේ කෙසේද?
විශේෂයෙන්ම නත්තලේ සැබෑ කොටස්කාරයන් වන දරුවන් මෙවැනි විසිතුරු දෑ ඉල්ලන විට වැඩිහිටියන් ජේසුස් ක්‍රිස්තුස් වහන්සේ ප්‍රතික්ෂේප කළ සොරකම, ඊර්ෂි්‍යාව වැනි හැඟීම්වලින්ද සිත පුරවා ගනු ඇත.
විශේෂයෙන්ම වාණිජකරණය වී ඇති නත්තල අප වැනි රටක ජනතාව ඇඳ දමන්නේ තවත් අමාරු තැනකටය. එම නිසා සැබෑ නත්තල හදවතින් පැනගොස් දැන් තිබෙන්නේ සාප්පූ සංකීර්ණවල සහ ඩිජිටල් තිර අතරේවීම ජේසුස් ක්‍රිස්තුස් වහන්සේ වුවද කම්පාවට පත් කරනු ඇත.
