මේ ලොකෙ මිනිස්සුන්ට හිතුවොත් කරන්න බැරි දෙයක් නෑ. අවශ්‍ය වෙන්නේ ඒ වෙනුවෙන් තියෙන උනන්දුව විතරයි. එහෙම හිතලා හිතලා තමන් කරන්න යන ව්‍යාපාරය ගැන ලොකුවට අදහසක් නැතිව පටන් අරන් මේ වෙද්දි සාර්ථකව තමන්ගෙ ව්‍යාපාරය කරගෙන යන අපූරු ආච්චි අම්මෙක් අපිට හම්බුණා. ඇය සුදර්මා. සුදර්මා ආච්චි අම්මගෙ වයස අවුරුදු 70ක්. ඇගේ තියෙන විශේෂත්වය තමයි මේ ආච්චි අම්මා අවුරුදු 22ක් පුරාවට තනියම කොමියුනිකේෂන් එකක් පවත්වාගෙන යාම.
අපි කවුරුත් දන්නවා සාමාන්‍යයෙන් කොමියුනිකේෂන් එකක් පවත්වගෙන යන්නෙ කම්පියුටර් ගැන, අන්තර්ජාලය ගැන මනා දැනුමක් තියෙන අය කියලා. හැබැයි මේ සුදර්මා ආච්චි අම්මා කොමියුනිකේෂන් එක පටන්ගත්තේ කම්පියුටර් ගැන කිසිම දැනුමක් නැතුව. කොටින්ම කොමියුනිකේෂන් එකක තියෙන්න ඕන මොන වගේ දේවල්ද කියලවත් අදහසක් ඇයට තිබුණේ නෑ.
ඒත් අද වෙද්දි මේ රඹුක්කන – කෑගල්ල පාරේ, පොල්ගහවෙල හන්දියේ තියෙන ධනංජය කොමියුනිකේෂන් එකේ ඇය නොකරන දෙයක් නෑ. ටයිප්සෙටින්, ග්‍රැෆික් ඩිසයිනින්, ෆොටෝකොපි, රීලෝඩ්, ඊමේල්, ට්‍රාන්ස්ලේෂන්, බිල් ගෙවන වැඩ හැමදේම සුදර්මා ආච්චි අම්මා මෙතන කරනවා. ඒ හැමදේම ඇය කරන්නෙ තනියම වීම තමයි ලොකුම විශේෂත්වය.
සුදර්මා මහත්මිය ඇගේ කොමියුනිකේෂන් එකට එන්නෙ උදේ හත වෙද්දි. ඒකට හේතුව තමයි ඒ අවට පාසලක ඉන්න ගුරුවරු ගුරුවරියන් ඔවුන්ගේ ෆොටෝ කොපි ගන්න එන්නෙ සුදර්මා ආච්චි අම්මගෙ කොමියුනිකේෂන් එකට නිසා. ඒ නිසා උදේ හත, අට කියන්නෙ ධනංජය කොමියුනිකේෂන් එක තරමක් කාර්යබහුල තැනක්. ඇයට මුලින්ම කම්පියුටර් ගැන දැනුම ලැබුණේ තමන්ගෙ පුතාගෙන්.
ඔහු සීඩී රයිට් කරන්න ගෙනාපු කම්පියුටර් එකෙන් තමයි අද සුදර්මා මහත්මිය සේරම වැඩ ටික තමන්ගෙ පාරිභෝගිකයන් වෙනුවෙන් කරලා දෙන්නෙ. ඒ වගේම තමයි ඇයට කවර් පේජ් හදන්න වගේම විවිධ ආයතනවලට ලේබල් නිර්මාණය කර දීමේ හැකියාවකුත් තියෙනවා. ඇය කියන විදිහට මේ සියල්ලම කාලෙ අරන් ඇය පුරුදු වෙලා තියෙන්නෙ කොමියුනිකේෂන් එකේ ඉද්දිමයි.
“මට දැන් ඉක්මණින් වැඩ කරන එක පුරුද්දට ගිහින්. කොහොමහරි මට පුළුවන් ඉක්මන්ට වැඩ කටයුතු ටික කරලා දෙනවා” ඇය පවසන්නේ එවැන්නක්.
සුදර්මා ආච්චි අම්මා කියන්නෙ කොමියුනිකේෂන් එකටම සීමා වුණ කාන්තාවක් නෙවේ. පාසල නිම වීමෙන් පසුව දෙමාපියන් පැමිණීමට ප්‍රමාද වන දරුවන්ව තමන් ළඟ තියාගෙන බලාගැනීමත් ඇගේ රාජකාරියක් වෙලා.
“ආසාවට පටන්ගත්තට කොමියුනිකේෂන් එකක මොනවද තියෙන්න ඕනෙ කියලවත් නොදැනනෙ මං මේක පටන්ගත්තේ. කිසිම දෙයක් නොදැන තනියම ඉගෙනනිමින් අවුරුදු 22ක් මම තනියම මේ කොමියුනිකේෂන් එක ඉදිරියට අරන් ආපු එක ගැන මට තියෙන්නෙ ලොකු සතුටක්” අතීතයත් වර්තමානයත් සංසන්දනය කරලා බලද්දි ඇයට ඇය ගැනම දැනෙන විදිහ ඇය කීවේ ඒ විදිහටයි.
සාමාන්‍යයෙන් කොමියුනිකේෂන් එකක් කියන්නෙ කාර්යබහුල තැනක්නෙ. තනි පුද්ගලයෙක්ට කොමියුනිකේෂන් එකක් පවත්වාගෙන යන එක තරමක් අපහසු වැඩක්. ඒත් අවුරුදු 22ම සුදර්මා ආච්චි අම්මා මේ කොමියුනිකේෂන් එක පවත්වගෙන ආවේ තනිවමයි. ඉඳහිට කොම්පියුටරයක් කැඩුණ වෙලාවට ඇය ජීවත් වන ප්‍රදේශයේම තරුණයෙක් නොමිලේම ඇවිත් ඇගේ කැඩුණු කොම්පියුටරය හදලා දෙන බව ඇය පැවසුවා.
කොච්චර කාර්යබහුල තැනක් වුණත්, එකම වෙලාවට පාරිභෝගිකයන් තුන් හතරදෙනෙක් පැමිණියත් ඒ කිසිම කෙනෙකුව රස්තියාදු නොකර වැඩ ටික කරලා දෙන්න ඇයට පුළුවන්. සුදර්මා ආච්චි අම්මා කියන්නේ අවවාදයට වඩා ආදර්ශය උතුම් බව පසක් කළ දිරිය කාන්තාවක්.
එරංදි කෞශල්‍යා ✍️
