කරදර පිරුණු ලොවක හොඳක් දැකිය හැක්කේ කෙසේද යන්න ඔබට ගැටලුවක් ඇති විය හැකියි. කරදරවලට එසේම තිබෙන්නට ඉඩ හරින්න. ඔබ විසින් කළ යුත්තේ කරදර ගැන කරදර නොවීමයි. ඒ සඳහා පහසුම මග වන්නේ සෑම දෙයකම හොඳ දැකීමයි
මොළයත් පුරුදු කළ යුත්තක්
අපි සියලු දෙනාම රැකියාවක නියුක්ත විය යුත්තෝ වන්නෙමු. එහෙත් රාජකාරී කටයුතු වලදී වෘත්තීය ගැනම සිතමින් අපි අවිනිශ්චිත තත්ත්වයන් ගැන සිතමු. එහෙත් වෘත්තියෙන් ඔබ්බට මනස මෙහෙයවමින් සතුට ගැන අපි සිතිය යුතුය. එසේම පෞද්ගලික ජීවිතයේදීත් අපට අභියෝග ඇත.
සිතැඟි පරිදි වෘත්තියක් තෝරා ගැනීමේ සිට තරඟකාරීත්වය, නෑදෑයින් මිතුරන් සමඟ ඇතිවන විරසක නැතිකර ගැනීමට ඇති හොඳම දෙය වන්නේ සෑම දෙයකම යහපත් පැත්තක් ඇති බව දැකීමට ඔබගේ මොළය පුහුණුකර ගැනීමයි. එමගින් සෑම අභියෝගයක් දෙසම සතුටින් බැලිය හැකිවනු ඇත.
කෘතඥතාවය පළකරන්න
හදවතින් පැන නගින ලස්සනම පුෂ්පය කෘතඥතාව පළකිරීමයි. ජීවිතයේ සියලුදේ වරදින විට ආසන්නතම සතුටුවිය හැකි දේ ගැන සිතන්න. එවැනි දේ කොළයක සටහන් කර ඔබටම කෘතඥතාව පළ කරන්න. ඔබට අමාරු විෂයයකට වැඩි ලකුණු ලබාගැනීම, ඔබට උදව්කරන මිතුරකු හෝ පවුලක් ලැබීම, රැකියා අවස්ථාවක් ආදී බොහෝ දෑ ඒ අතර විය හැකිය. මෙම ලැයිස්තුව සකස් කිරීමේදීම ඔබේ මනෝභාවය සම්පූර්ණයෙන් යහපත් භාවයකට පැමිණීමට ඉඩ ඇත.
භාවනාව
මොහොතක ශාන්තිය ඔබ අත්විඳිනු නිසැකය. ගැඹුරු හුස්ම ගැනීම, මල්වත්තක ඇවිදීම, සන්සුන් සංගීතය ආදී ලෙසින් භාවනාවට විවිධ ක්‍රම ඇත. මේ සුළු විවේකය ඔබව දවසම ප්‍රාණයෙන් පුරවනු ඇත. සතුට පැමිණෙන්නේ ඇතුළාන්තයෙනි.
අන් අයට උදව් කරන්න
සෘජුවම උදව් කිරීම හෝ හොඳ දෙයක් කිරීම යන දෙකම මේ ගණයට වැටේ. ඔබ පහනක් දල්වන්නේ නම් අවට සිටින්නන්ටද එළිය වැටෙනු ඇත. එහෙත් ඔබව පහත් ලෙස සලකන අයට උදව් කිරීමේන් වළකින්න.
ඔබව ආදරයෙන් වැළඳගන්න
විශ්වයේ ඇති අනෙක් සෑම දෙයකට මෙන්ම ඔබටද ආදරය අවශ්‍යයය. ඔබ අතපසුවීම් ගැන ඔබටම දොස් පැවරීම වෙනුවට මෘදු ලෙස ඔබව අමතමින් ඔබව ධෛර්යවත් කරන්න. සෑමවිටම හිස ඉහළට ඔසවා, නිකට ඉහළට තබාගැනීමෙන් ඔබ ගැන ඔබ තබන විශ්වාසය වැඩිවෙයි.
ධනාත්මක ප්‍රතිඥා නිතරම සිදුකරන්න
ධනාත්මක සිතිවිලිවලට ධනාත්මක ප්‍රතිඵල ආකර්ශණය වෙයි. සෘණාත්මක සිතිවිල්ලක් පහළ වූ විගස එයට අභියෝග කර පළවා හරින්න.
නැවත නැවත නොසිතන්න
නැවත නැවත සිතීම යනු මනසෙහි නොපවතින අවස්ථා ගොඩනැගීමයි. යථාර්ථය නොවන මෙම සිතිවිලි නිසා පසුතැවිල්ලට හේතුවන ගැටලු මතුකරයි.
(https://idreamcareer.com ඇසුරෙන්)
සුනිල් අල්ගම
