යම් රටක තිබෙන හොඳම ආයෝජනය වන්නේ ඒ රටේ අධ්‍යාපනය වෙනුවෙන් සැළකිය යුතු මුදල් ප්‍රමාණයක් වැය කිරීමකි. එබැවින් රටේ අධ්‍යාපනයේ තිබෙන විභාග ක්‍රමය වනාහි දරුවන්ගේ පූර්ණ දැනුම සහ බුද්ධිය මැන බැලීමක් නොවුණත් යම් ප්‍රමාණයකට දරුවන්ගේ දැනුම සහ බුද්ධිය මැන බැලීමක් ලෙස සැලකිය හැකිය.
එම නිසා දරුවන් හොඳ විභාග ප්‍රතිඵල ලබාගැනීම සඳහා හොඳින් අධ්‍යාපනය ලබා පාඩම් වැඩ මතකයේ ධාරණය කරගනිමින් ඒවා නැවත නැවතත් මතක් කරමින් කඩයිම් විභාග සඳහා පෙර සිටම සූදානම් විය යුතුය.
විභාග සඳහා හොඳින් සූදානම් වන දරුවන් හොඳ ප්‍රතිඵල ලබන්නේ ඔවුන්ගේ සූදානම හොඳ නිසාය. නමුත් විභාග අසමත් වන දරුවන් සියලු දෙනා මෝඩ හෝ බුද්ධිමත් නොවන දරුවන් යැයි කිසිවෙකුටත් තක්සේරු කළ නොහැකිය.
මෙවන් තත්ත්වයක් තුළ දරුවන් වෙනුවෙන් විභාග කලට වේලාවට පවත්වමින් ප්‍රතිඵල නියමිත කාලයේ නිකුත් කරමින් දරුවන්ටත් ඔවුන්ගේ දෙමව්පියන්ටත් තම තත්ත්වය මැන ගැනීමට සහ ඉදිරි ජීවිත සැලසුම් කරගැනීමට විභාහ දෙපාර්තමේන්තුවත් අධ්‍යාපන අමාත්‍යංශයත් රජයත් සියලු විභාග කලට වේලාවට පැවත්වීමට නොපමාව කටයුතු කළ යුතුය.
තවත් දින 6 කින් පහ ශ්‍රේණියේ දූ පුතුන්ගේ වැඩකිඩ මැන බලන ශිෂ්‍යත්ව විභාගය පැවැත්වෙනු ඇත. එය නියමිත දිනයට පැවත්වීම පිළිබඳව ඉහත ආයතන සියල්ලටම ස්තූතිවන්ත විය යුත්තේ පුංචි පැටවුන්ගේ මනසට වඩා ශිෂ්‍යත්වයේ බර අරගෙන සිටින ඔවුන්ගේ අම්මලා තාත්තලා ඒ බරෙන් ඔක්තෝම්බර් 15 වැනිදා නිදහස් වන නිසාය.
මේ අවස්ථාවේ මතක් කළ යුත්තේ තව දින කිහිපයකින් එළඹෙන ශිෂ්‍යත්වය සඳහා දරුවන්ව තලාපෙලා හිර කිරීමක් නොකළ යුතු බවය. මන්ද ශිෂ්‍යත්වය යනු දරුවාගේ ජීවිතය තීරණය කරන එකම විභාගය නොවේ.
එහෙත් විශ්වවිද්‍යාල ප්‍රවේශයටත් රැකියා වෙළෙඳපොළටත් තරුණ දරුවන් විවර කරන උසස් පෙළ විභාගය නොවැම්බර් මාසයෙන් ලබන වසරේ ජනවාරි මාසයට කල් දැමීම ඒ තරම් හොඳ කාරණයක් නොවිය හැකි අතර ඒ නිසාම සාමාන්‍ය පෙළ විභගයත් ජුලි මාසයට කල් ගොස් ඇත. මේ නිසා දැන හෝ නොදැන දරුවන්ගේ ජීවිත ආපස්සට යෑමක් සිදුවන අතර මනසේ ඇති වන ආතතිය සහ කළකිරීම ඇතැම් විට දරුවන්ට ජීවිතය එපා වීමටද හේතු විය හැකිය.
එපමණක් නොව එම දරුවන්ද තමන්ගේ අනාගතය තෝරාගැනීමට සලස්වන උසස් පෙළ තවත් කල් ගියහොත් ඉල්ලීම් දිනාගැනීමට විශ්වවිද්‍යාල ශිෂ්‍යයන් මෙන් පාරට බැසීමේ සංස්කෘතියට එකතුවනු ඇත. එවිට රජයට සිදුවන්නේ අලි මදිවට කොටිත් බලාගැනීමට අතිරේක බට කණ්ඩායම් කැඳවීමටය.
