බොහෝදෙනා අන් අයගේ වත් පොහොසත්කම්, අධ්‍යාපන මට්ටම්, තනතුරු ලාභ වැනි දියුණුවේ මංපෙත් දැක මට නැති දේ ඒ අයට හිමි වුණේ කොහොමද ඇයි මට අහිමි වුණේ යනුවෙන් අන්‍යයන්ගේ සැපත සතුට ගැන අකුල් හෙළීම ඉරිසියාව ලෙස හඳුන්වන්න පුළුවන්. කිසිදු යහපතක් හිමි නොවන එවැනි දේ අතහැර කෙනෙකුගේ දියුණුව පැතීම තුළ නිතැතින්ම ඔබේ දියුණුව උදාවන බව තේරේවි…
ඉරිසියාව නරක ආකල්ප වර්ධනය කරයි
සාර්ථක පුද්ගලයින් දෙස බලන්න. ඔවුන් තුළ ඉරිසියාව නැත. ධනාත්මක ආකල්ප ඇති ඔවුහු සෑම කුඩා අවස්ථාවක්ම විශාල සාර්ථකත්වයක් බවට පත්කරගැනීමට පසුබට නොවෙති. ඔවුහු විවේකයක් ලැබෙන ඕනෑම වෙලාවක යමක් කිරීමට සූදානම් වෙති. ඉරිසියා කරන්නෝ ඒ වෙනුවට නිතරම පැමිණිලි කරනවා මිස තමුන්ට අවශ්‍ය දේ සිතීමට නොපෙළඹෙති
ඉරිසියාව සතුට නැතිකර, ණය බර සහ දුක්ඛිත බව ඇතිකරයි
ඔබට කාර්යාලයේදී හෝ වටපිටාවේදී කිසිවෙක් ඉරිසියාවෙන් කටයුතු කරන්නේ නම් ඒ දෙස හොඳින් බලන්න. එම තැනැත්තාගේ ජීවන රටාව සම්පූණයෙන්ම අඩුපාඩු සහිත දුක්ඛිත බවින් පිරුණු එකක් වන බව ඔබට වටහා ගන්නට හැකිවනු ඇත. තමන්ට නොලැබෙන දේ තව කෙනෙක්ට ලැබෙන විට එවැනි සිතුවිලි සමහරුන්ගේ සිත් තුළ ඉපදේ.
ඉරිසියාව වෘත්තියට බාධාවක්
ඔබට යමෙකුගේ උසස් වීමක් අසාධාරණ ලෙස පෙනිය හැකි නමුත් එයට තුඩුදුන් කළමනාකාරීත්වයේ තීරණ දැකගත නොහැකිය. ඉරිසියාව ග්‍රහණය කරගැනීම නිසා ක්‍රෝධය ඇති වී ඔබ හොඳ සේවකයකු වීම වළකයි. එමගින් ඔබගේ උසස්වීම් ලබාගැනීමේ අවස්ථා ක්‍රමයෙන් මගහැරී යයි. ඉරිසියාව අතහැර විශිෂ්ට ආකල්පයෙන් වැඩ කිරීම තුළින් ඔබ සතුටට පත්ව රැකියාවද දියුණුවට පත්වනු ඇත.
ඉරිසියාව මත්ද්‍රව්‍ය භාවිතයට පොළඹවයි
සමහරු මත්පැන්වලට සහ දුම්පානයට ඇබ්බැහි වන අතර තවත් සමහරුන් අනවශ්‍ය ලෙස ආහාර අනුභවයට පෙළඹෙති. එම පුරුදු තාවකාලිකව ඔබ තුළින් ඉරිසියාව පහකරන නමුත් පළිගැනීමේ චේතනාවක් සමග ඉරිසියාව නැවත මතුවෙයි. ස්වයං අවබෝධය සමග කටයුතු නොකරන තාක් කල් ඔබට මිතුරන් සහ පවුලේ අය නැතිී වී ආදායම අහිමිව බොහෝ ප්‍රශ්නවලට මුහුණ දීමට සිදුවනු ඇත.
ඉරිසියාව සැකය ඇතිකරයි
‘ඇයි මටම විතරක් නැත්තේ‘ යන සිතිවිල්ල නිසා ඔබේ ආත්ම වටිනාකම ඔබ විසින්ම දියකර හරිනු ලබයි. ඔබේ තීරණ ඔබටම ප්‍රශ්නකාරී සහ අවිනිශ්චිත විය හැකිය. අනුන් හා සාකච්ඡා කිරීමට ඔබට නොහැකි වෙයි. මේ දක්වා කර ඇති තේරීම් ගැන ඔබ අවිශ්වාස කරන නිසා නිර්භීතව අලුතින් තීරණයක් ගැනීමට ඔබ මැළිවෙයි.
ඉරිසියාව ජීවිතයට ලැබෙන දේ අඩුකරයි
එක රැයින් සිදු නොවූවත් සාර්ථකත්වය ගැන නිතර සිතීමෙන් එකී ධනාත්මක සිතුවිලි ඔබේ සාර්ථකත්වයට බෙහෙවින් ඉවහල් වනු ඇත. ඔබට කිසිවක් නොලැබෙන බව නිතර සිතීමෙන් එම සෘණාත්මක සිතුවිලි ඔබේ ජීවිතයට අයහපත් ප්‍රතිපලම ඇතිකරයි
(https//www.wisebread.com ඇසුරෙන් )
සුනිල් අල්ගම
