සාමයේ අරුත ලෝකයටම කියාදෙන අසිරිමත් නත්තල උදාවී තිබේ. එහෙත් මේ වනවිට සාමයේ කුමරු ජේසුස් ක්‍රිස්තුස් වහන්සේ ලොවට කියාදුන් නත්තලේ අරුත වාණිජකරණය වෙමින් හුදෙක්ම එය ප්‍රීතිවන කනබොන තෑගි හුවමාරු කරන ලෞකික උත්සවයක් පැත්තට තල්ලු වෙමින් තිබේ.
ජේසුස් ක්‍රිස්තුස් වහන්සේ ලොවටම කියාදුන් අපූරු පාඩම වූයේ මිනිසාටත් සතුන්ටත් පරිසරයටත් ආදරය කිරීම, දයාව දැක්වීම, කරුණාව බෙදීම වැනි උතුම් ගුණාංගයන්ගෙන් මිනිස් සමාජය පොහොසත් වියයුතු බවයි. එයට කදිම උදාහරණයක් සපයමින් උන්වහන්සේ වරෙක ගණිකාවට ගල් ගසමින් සිටි මිනිසුන්ට පැවසුවේ ඇය පව්කාරියක් නම් ඇය කරා යන සියලු පුරුෂයන්ම පව්කාරයන් වියයුතු බවයි.
වැඩිදුරටත් පවසා සිටියේ පව් නොකළ සිටි අයෙක් වේ නම් පමණක් ඇයට පළමු ගල ගැසිය හැකි බවයි. මෙහිදි උන්වහන්සේ පෙන්වා දෙන්නේ සියලු සත්ත්වයන්ට එක සමානව ජීවත්වීමේ අයිතියක් සහ ගෞරුත්වයක් ලැබිය යුතු බවයි.
උන්වහන්සේ බොහෝවිට කියා සිටියේ තමන්ගේ අවට සිටින මිනිසුන් වෙනුවෙන් ප්‍රේමය පැතිරවිය යුතුය යන්නයි. ආදරය, දයාව, කරුණාව වැපීරීම තුළ පුද්ගලිකවත් සාමූහිකවත් කෙනෙකු සුවපත් කළ හැකි අතර ඉන් මුළුමහත් සමාජයම සුවපත් කළ හැකි බවයි. ඒ නිසා සමාජයට අපරාධකරුවෙකු, සොරෙකු බිහිවීම වැළකෙන බව පෙන්වා දුන් උන්වහන්සේ මිනිසුන්ගෙ සිත් සුවපත් කිරීම මිනිසාගේ පරම යුතුකම බවද පෙන්වා දී තිබේ.
තවද උන්වහන්සේ කුරුසය මත ඇණ ගසා වේදනාවෙන් සිටියදීත් පවසා ඇත්තේ මෙලෙස තමාට වද දී තමාව මරණය කරා ගෙනයන මිනිස්සුන්ට පවා උන්වහන්සේ වෛර නොකරන බවයි. මෙහෙව් වේදනාවක් මධ්‍යයේ වුවත් මෛත්‍රී සහගත සිතුවිලි මුදාහළ හැකි අපූරු සිතක් උන්වහන්සේ සතුව පවතින බවයි.
එවන් අර්ථාන්විත සිතුවිලි සමුදායකින් හැඩ වූ ආගමික දිනයක්, සංස්කෘතික උත්සවයක් කාලයාගේ ඇවෑමෙන් නත්තල් ගසකට, නත්තල් සීයාට, නත්තල් කැරෝල්වලට, නත්තල් පාටිවලට මෙන්ම නත්තල් සේල්වලට බාලවීමේ විපාකය අදටත් වඩා මුළුමහත් සමාජයට දැනෙන්නෙ හෙට දවසේ වන බව ඉඳුරාම පැහැදිලිය.
ඒ නිසා කිතුනු අයත් බෞද්ධ අයත් මනුෂ්‍ය සංහතියේ සමාජිකයන් බව සිතා ජේසුස් වහන්සේ දේශනා කළ අර්ථාන්විත නත්තල සමාකාමීව සැමරීමට සහ සිතුවිලි වෙනස් කරගැනීමට යොදාගන්නේ නම් එළඹෙන 2024 වඩාත් සොඳුරු වනු ඇත. ඒ සිතුවිලි පෙරදැරි කරගෙන මේ නත්තල සමරන්න.
ඔබ සැමට අරුත්බර සැබෑ නත්තලක් වේවා…
