භාණ්ඩ හා සේවා බද්ද හෙවත් වැට් බද්ද (Vat)වැඩ පෙන්වීමට පටන්ගෙන තිබේ. එය 18% මට්ටමට වැඩි වූයේ ජනවාරි පළවෙනිදා සිටය. එලෙස වැඩි වීමත් සමග මෙරට බොහෝ භාණ්ඩ හා සේවාවල මිල ඉහළ ගිය බව ප්‍රවෘත්ති ලෙස මාධ්‍ය ඔස්සේ නිකුත් වීමත් කෙටි පණිවුඩ ඔස්සේ ජංගම දුරකථනයට ලැබීමටත් පටන්ගෙන තිබේ.
ඒ අනුව පෙට්‍රල්, ඩීසල් මිල සහ ගෑස් මිල සාමාන්‍ය ජනතාවට දැනෙන ලෙස වැඩි වී තිබේ. විදුලි සංදේශ සේවා ගාස්තු ද ඉහළ දමා ඇත.
ආහාර ද්‍රව්‍ය සියල්ලේම මිල වැඩි කර ඇත. සෞඛ්‍ය, ප්‍රවාහන, අධ්‍යාපන, විනෝදාස්වාදය වැනි මෙකී නොකී සියලු සේවාවල ගාස්තු වැඩි කර ඇත.
නමුත් පවතින රජය තෙල් මිල වැඩි කිරීම සම්බන්ධයෙන් කිය සිටින්නේ තෙල්වලට අයකළ වරාය හා ගුවන්තොටුපොළ සංවර්ධන බද්ද රජය විසින්ම ඉවත් කළ නිසා වැට් වැඩිවීම හේතුවෙන් තෙල් මිල ඉහළ ගියද එය තෙල් මිල සඳහා ලොකු බලපෑමක් ඇති නොකරන බවයි.
නමුත් අපි හොඳාකාරවම දන්නා කරුණ වන්නේ ඉන්ධන මිල ඉහළ යෑමත් සමග මේ රටේ සියලු භාණ්ඩ හා සේවාවල මිල ගණන් එක තත්පරයකින් ඉහළ නැංවෙන බවයි. මේ සියල්ලෙන්ම බැට කන්නෙ රජය නොව සාමාන්‍ය ජනතාවයි.
ජන හා සංඛ්‍යා ලේඛණ දෙපාර්තමේන්තුව දැනටමත් පෙන්වා දී ඇත්තේ මෙරට පවුල්වලින් 60% කගේ පමණ මාසික ආදායම පහළ වැටී ඇති බවයි. උද්ධමනයද 2% – 3% දක්වා ඉහළ ගොස් ඇති බවයි.
මෙවන් තත්ත්වයක පසුවන ජනතාව ඉදිරි දින කිහිපය තුළ කුමන තීරණයක් ගනීවි දැයි කිව නොහැකි අතර සක්සුදක් සේ පැවසිය හැක්කේ 2022 ඇතිවුණා මෙන් ජන අරගලයක් නුදුරේදීම මෙරටේ ඇති විය හැකි බවයි.
දැනටමත් ජනතාවට මාසිකව ලැබෙන මුදලින් හෝ දෛනිකව උපයන මුදලින් ජීවත්වීම සිහිනයක් බවට පත්ව තිබේ. මෙවන් අවධියක මූලික අවශ්‍යතාවන් පවා ඉටු කරගැනීමත් අරගලයක් වී ඇත. එවන් වකවානුවක විශේෂයෙන්ම ලංකාවේ දැනුම, බුද්ධිය පිටරටට ගලායමින් පවතී.
තවද කලක සිට මේ රට තවතවත් ආගාධයට තල්ලු වන්නේ මේ රටේ නිෂ්පාදන අවම වීම, නිෂ්පාදනවල ගුණාත්මකභාවය අඩු වීම වැනි කාරණා නිසා බව රජය වහ වහා තේරුම් නොගතහොත් සහ මෙරට ජනතාව බලාගැනීමට කැපනොවුණහොත් ලංකාව තවතවත් අසරණ වනු ඇත.
