මේ රටේ දේශපාලනය පැහැදිලිවම වෙනස්වෙමින් අලුත් දේශපාලන සංස්කෘතියක් කොටින්ම කියොතොත් අලුත් ඉරක් පායනා සෑම දවසකම මේ රටේ අහිංසක ජනතාවට අදට වඩා හෙට හොඳ වේයැයි, අනාගතය ඊටත් වඩා හොඳ වේ යැයි යන අලුත් බලාපොරොත්තුවක් ඇතිවේ. එය මේ මෙහොතේද එසේමය.
වසර 76 ක් මාරුවෙන් මාරුවට මේ රට කරවූ විවිධ දේශපාලන පක්ෂවල අය ගෙදර යවා රටේ ජනාධිපතිවරයා නව පක්ෂයකින් තෝරාගැනීම සහ ඔහුගේ නායකත්වය යටතේ තුන් දෙනෙකුගෙන් යුත් කැබිනට් මණ්ඩලයක් රට කරගෙන යෑම සඳහා පත් කිරීමෙන්ම මේ රටේ ජනතාවට අලුත් දවස පිළිබඳව අලුත් අනාගතය පිළිබඳව යම් රිදී රේඛාවක් නිල් අහසේ පායමින් තිබෙන බවට විශ්වාසය ගොඩ නැගෙමින් තිබීමද පුදුමයක්ද නොවේ.
එය සුබම යැයි හැඟෙන්නේ ලංකාවේ මෙතෙක් බිහි වූ කුඩාම ආණ්ඩුව ගත් තීන්දු තීරණවලින්ද රටට හිතකර ගතියක් කුඩා මිනිසා ගැන සිතට දැනී ඇති ගතියක් පෙනෙන්ට තිබෙන නිසාමය. එක රැයකින් දැකපු සියලු සුබ සිහින සැබෑනොවන බව දන්නා අප ටිකක් විමසිල්ලෙන් බලා සිටිය යුතුමය. විශේෂයෙන්ම නොවැම්බර් 14 වැනිදා පැවැත්වීමට නියමිත මහා මැතිවරණයට පෙර මේ පුංචි ආණ්ඩුව ලොකු මිනිහාටත් පොඩි මිනිහාටත් එක ලෙස දැනෙන බඩගින්දර පිළිබඳව හොඳින් තේරුම් ගෙන එය විසඳීමට කටයුතු කරන්නේ නම් 58% ක් ඔවුන්ට නොලැබුණු ඡන්ද නැවත නැවතත් ඔබ පිළිබඳව අධ්‍යනයක යෙදෙනු ඇත. එයින්ද නොනැවති මේ රටේ බහුතර ජනතාවට දැනෙන ලෙස ගෑස් මිල අඩුකිරීම, දැනට කළාක් මෙන් ඉන්ධන මිල තවත් අඩු කිරීම, ජල සහ විදුලි බිල් ද අඩුකිරීම මගින් මෙතෙක් ආණ්ඩු නොකළ සහන සෑම දෙනාටම ලබාදීමෙන් ඡන්ද පදනම රිසිසේ වෙනස් කරගත හැකිය. ඒ නිසා හෙණ්ඩුව ඔබ අතේය.
මෙතෙක් පැවති රජයන්ට ජනතාව ලෙස හුදෙක්ම පෙනුනේ රජයේ සේවකයන් පමණක්ය. මන්ද ආණ්ඩුවෙන් පඩි වැඩි කළේ ඔවුන්ගේය. පෞද්ගලිය අංශයේ වැඩ කරන ජනතාව, දවසේ පඩියට වැඩ කරන ජනතාව මෙන්ම එදිනෙදා කුලියක්මලියක් කරගෙන ජීවත්වන ජනතාව ඔවුන්ට ජනතාව ලෙස පෙනුනේ නැත. දරාගත නොහැකි බඩු මිළ නිසා අපි ඉහත සඳහන් කළ ජනතාව වේලක් කා වේලක් නොකා සිටි වාර අනන්තවත් ඇත.
පොඩිම මිනිහාට ලබාදුන් දුප්පත්කම තව තවත් පවත්වාගැනීමේ අල්ලස් වැනි සියල්ල නතර කරමින් ශ්‍රී ලාංකික සෑම පුරවැසියෙකුටම තුන්වේල කා බී නිදහසේ ජීවත්විය හැකි රටක් නිර්මාණය කිරීම ඔබට භාරය. එම නිසා බඩු මිල අඩු කිරීම අත්‍යාවශ්‍ය සේවාවල ගුණාත්මකභාවය වැඩි කරමින් පාලන මිලක් පැනවීම මඟින් සැමට ඉන්න හිටින්නට යහපත් රටක් උදාවනු ඇත.
