තවදුරටත් කාන්තාවන්ගේ නුවණ හැඳිමිටේ යන ප්‍රකාශය වලංගු නොවේ. මන්දයත් මෙවර පාර්ලිමේන්තුවට උගත් බුද්ධිමත් වැඩිම කාන්තා නියෝජනයක් එක්ව ඇති බැවිනි. ඔවුන්ගෙන් බහුතරයක් නීතිඥවරියන්ය. එසේත් නොමැති නම් කිසියම් හෝ වෘත්තීමය සුදුසුකම් සපුරාගත් කාන්තාවන්ය.
සාමාන්‍යයෙන් සෑම වසරකම මාර්තු මාසයේදී හෝ අගෝස්තු මාසයේදී මෙරට කාන්තාවන් ගැන වැඩියෙන්ම කතා කළ අතර එයට හේතුව වූයේ ජාත්‍යන්තර කාන්තා දිනය යෙදීම සහ පියයුරු පිළිකා වළක්වා ගැනීමේ මාසය වීමයි. නමුත් දැන් දැන් මෙරට කාන්තාවන් පිළිබඳ විශ්වාසයෙන් සහ අවධානයෙන් කතා කරන්නේ පැවති මැතිවරණයේදී ලබා ඇති ප්‍රගතිය පිළිබඳවයි.
ජාතික ජනබල වේගයෙන් ම පමණක් මන්ත්‍රීවරියන් විසිදෙනෙකු පාර්ලිමේන්තුවට තේරී පත්වී ඇත්තේ 19 දෙනෙකු ඡන්දයෙන් සහ එක් අයෙකු ජාතික ලැයිස්තුවෙන් වශයෙනි. ජාතික ජනබලවේගයෙන් කාන්තාවන් 36 දෙනෙකු තරග කර ඇත. එය මෙරට මැතිවරණයකට තරග කළ වැඩිම කාන්තාවන් සංඛ්‍යාවක් ලෙස ඉතිහාසගත වේ.
සමගි ජන බලවේගයෙන්ද කාන්තාවන් දෙදෙනෙක් අලුත් පාර්ලිමේන්තුව නියෝජනය කරයි. මේ අනුව බලන කල වර්තමාන පාර්ලිමේන්තුවේ කාන්තා නියෝජනය 10% දක්වා වර්ධනය කරගැනීම හොඳ පෙරනිමිත්තක් ලෙස දැක්විය හැකිය.
1960 දී ලෝකයේ ප්‍රථම අග්‍රාමාත්‍යවරිය ලෙස දිවුරුම් දුන්නේ සිරිමාවෝ බණ්ඩාරනායක මැතිණියයි. 1994 දී මෙරට ජනාධිපතිවරයෙක් ලබාගත් වැඩිම මනාපය වන 62% ලබාගනිමින් ශ්‍රී ලංකාවේ ප්‍රථම ජනාධිපතිනිය වන්නේ චන්ද්‍රිකා බණ්ඩාරනායක කුමාරතුංග මැතිනියයි. ඉන්පසුව පසුගිය සැප්තැම්බර් මාසයේදී ආචාර්ය හරිනි අමරසිංහ මෙනවිය ශ්‍රී ලංකාවේ තෙවන අග්‍රාමාත්‍යවරිය ලෙස දිවුරුම් දුන් අතර ඇය මෙවර මහ මැතිවරණයෙන් කොළඹ දිස්ත්‍රික්කයේ සියලු පිරිමින් අභිබවා ඡන්ද
6,55,289 ලබා පෙරට පැමිණෙන්නේ මෙරට අග්‍රාමාත්‍යවරයකු ලබාගත් වැඩිම මනාප සංඛ්‍යාවක් බවට වාර්තාවක් තබමින්ය. එසේ නම් ශ්‍රී ලාංකික කාන්තාව තවදුරටත් කුස්සිය තුළ සාම්ප්‍රදායික වෘත්තීන්ට කොටුවී සිටින අය නොවන බව දැන් ඔප්පු කර ඇත.රටේ ජනතාව දැන් වැඩේ ලෙහෙසි කර ඇත. සුබ නැකතට රට අනුරට දී එක මිටකට රටේ වැඩ කොටසක් කාන්තාවන්ටද පවරා ඇත.
මේ වනවිටත් අමාත්‍ය මණ්ඩලයේ ධුර දෙකක් කාන්තාවන්ට ලබාදී තිබේ. බලයේ සිටි කාන්තාවන් බලයත් හැකියාවත් තියාගෙන නොකළ බොහෝ වැඩ රටේ කාන්තාවන් වෙනුවෙන්, රටේ දරුවන් වෙනුවෙන් පමණක් නොව මුළු රටම ගැන සිතා ඔබට දැන් කළ හැකිය. දැන් හැඳි මිටේ නුවණට එහා ගිය නුවණක් ඔබට ඇති බව පෙන්විය හැකිය. ඔබ විටෙක වන දියණිය, සහෝදරිය, පෙම්වතිය, බිරිඳ ගෘහණිය සහ මිත්තණියක ලෙස එක මිටකට ගෙන හදවතෙනුත් ඔළුවෙනුත් රට නැගීම වෙනුවෙන් තීරණ ගත යුතුමය. ශ්‍රී ලාංකික කාන්තාව බලවත් බව මුළු ලෝකයටම පෙන්විය යුතුය.
