මහා පරාක්‍රමබාහු රජතුමා එදා අහසින් වැටෙන එක දිය බිඳක්වත් අපතේ නොයවා ප්‍රයෝජනයට ගත යුතුයැයි කී කතාවට දැන් තවත් කොටසක් අපට එක් කළ හැකිය. මන්ද යත් රට තුළ ඇතිවී තිබෙන සහල් හිඟය නිසා බත් ඇටයක්වත් බත්පතෙන් අපතේ නොදැමිය යුතුය.
එක සහල් ඇටයක්වත් පිටරටින් ආනයනය නොකරන බවට විපක්ෂයේ සිටියදීත් පහුගිය ජනපතිවරණ ප්‍රචාරක රැලිවලදීත් පොරොන්දු වූ ජනාධිපතිවරයාට එම පොරොන්දුව කඩ කිරීමට සිදුව ඇත්තේ උත්සව සමය අභිමුව දී රට තුළ සහල් හිඟයක් ඇතිවී තිබෙන නිසාය. මෙය කෘතිමව ඇතිකළ සහල් හිඟයක් වුවොහොත් එය කවුරුන් විසින් කෙසේ ඇති කළේ දැයි සොයා බැලිය යුතුමය.
නත්තල සහ නව වසර ළඟ එන නිසා පාරිභෝගික ජනතාව වෙනදාටත් වඩා සහල් සොයමින් ඔබ මොබ සැරිසරන අතර ඔවුන් වැඩි මිලට හෝ සහල් මිලදී ගැනීමට පෙළඹෙන්නේ නිවාඩු දවස්වලට තමන්ට කන්නට මෙන්ම ගෙදරට එන අමුත්තන්ට සංග්‍රහ කිරීමටත් බත් වේලක් පිළිගැන්වීම අපේ ආගන්තුක සත්කාරයේ කොටසක් වන නිසාය. මෙවන් පසුබිමක වෙළෙඳ මාෆියාවක් තුළින් ජනතාවාදී රජයක් පරාජයවීම ජනතාව කිසිසේත්ම අනුමත නොකරනු ඇත.
ඇතිවී තිබෙන සහල් හිඟය මඟහරවා ගැනීමේ අරමුණින් වර්තමාන රජය මේ මස 20 වැනිදා දක්වා ආනයන බලපත්‍රයක් නොමැතිව වුවත් මෙරටට හාල් ගෙන්වීමේ අවස්ථාවක් වෙළෙන්දාට ලබා දී ඇත. සුළු සහ මධ්‍ය පරිමාණ මෝල් හිමියන් පවසන්නේ මේ තීරණය රජය ගෙන ඇත්තේ ප්‍රමාද වී බවය. ඒ නිසා උත්සව සමය ළඟට ඇවිත් තිබියදීත් රට තුළ හාල් හිඟයක් ඇතිවී තිබෙන බව ඔවුන්ගේ අදහසය.
ජනාධිපතිවරයා මැදිහත් වී හාල් හිඟය විසඳීම සඳහා නාඩු සහල් කිලෝවක තොග මිල රුපියල් 225 ක් ලෙසත් සිල්ලර මිල රුපියල් 230 ක් ලෙසත්, සුදු කැකුළු කිලෝවක තොග මිල රුපියල් 215 ක් ලෙසත් සිල්ලර මිල 220 ක් ලෙසත්, ආනයනික නාඩු සහල් කිලෝවක සිල්ලර මිල රුපියල් 220 ක් සහ සම්බා කිලෝවක තොග මිල රුපියල් 235 ක් ලෙසත් විකුණුම් මිල රුපියල් 240 ක් ලෙසත් මෙන්ම කීරි සම්බා කිලෝවක තොග මිල රුපියල් 255 සහ සිල්ලර මිල රුපියල් 260 ක් ලෙසත් ප්‍රකාශ කර ඇත.
මෙය දැන් දැවෙන ප්‍රශ්නයක් වී ඇත්තේ ලංකාවේ කිසිදු ආණ්ඩුවකට මෙරට මහා පරිමාණ හාල් මෝල් හිමියන් පාලනය කිරීමේ කොන්දක් නැති බව ඉහත සිද්ධියෙන් මනා ලෙස ඔප්පු වී ඇති නිසාය. ජනාධිපතිවරයාත් මැදිහත් වී කර ඇත්තේ පාරිභෝගික අප කබලෙන් ළිපට ඇද දැමීමක්ය. දැන් අපට කාගේ සරණක්ද?
