තිස්තුන් කෝටියක් දෙවි දේවතාවන්ගෙන් යම් සරණක් ඉල්ලා නැති කෙනෙකු මේ රටේ නොමැති තරම්ය. එසේ සරණක් ලැබුණු මිනිසුන් තිස්තුන් කෝටියක් දෙවි දේවතාවන් පිළිබඳව හොඳ හිතක් මවාගත්තත් සරණ නොලබන සියලු දෙනාම ඔවුන් පිළිබඳව මවා ගන්නේ ඒ තරම් හොඳ හිතක් නොවෙයි. එය එසේ වුවත් තවමත් අප යම් කරදරයකදී, විපතකදී කොටින්ම කියතොත් හොඳ කටයුත්තකදී වුවද යදින්නේ ලොව වෙසෙනා තිස්තුන් කෝටියක් දෙවියන් වීම පුදුමයක් නොවන්නේද?
සමාජ මාධ්‍ය ක්‍රියාකාරයෙකු වූ චමුදිත මෙන්ම ප්‍රධාන ධාරාවේ මාධ්‍ය ආයතනයක වැඩසටහන් මෙහෙයවන්නකු වූ චතුර කතරගම දේවාලයේ කතරගම දෙවියන්ට ලැබෙන පඬුරුවලට සහ පූජා භාණ්ඩවලට වෙන හරි දේ අනාවරණය කිරීමෙන් පසුව මේ රටේ බහුතර දේව භක්තිකයන්ට කතරගම දෙවියන් පිළිබඳව තිබූ ශ්‍රද්ධාව මෙන්ම විශ්වාසයද අඩු කළ අතර එය නැවත වැඩිවීමට පටන් ගත්තේ කතරගම දේවාලයේ නව නිලමේවරයා මහරගම අපේක්ෂා රෝහල වෙනුවෙන් කළ සේවාව නිසාය.
මුලින් පිළිකාව නිසා මිලින වී යන දරුවන් වෙනුවෙන් ඉදිකළ අංග සම්පූර්ණ වාට්ටුවත් පසුගියදා ගුවන් හමුදාව සමඟ එක්ව ඉදිකරමින් විවෘත කළ ඇට මිදුලු බද්ධ කිරීමේ ඒකකයත් සමඟ බෝහෝදෙනා කියා සිටියේ දෙවියන්ට දෙන පඬුරුවලට පින මිහිපිටදීම ඔවුන්ට ලැබෙන බවය.
මෙම අනාවරණයෙන් පසුව බොහෝ පිරිස් සමාජ මාධ්‍යයේ පවා සටහන් කර තිබුණේ කතරගම දෙවියන් දැන් ජීවමානව වැඩ සිටිනා බවය. එය අද ඊයේ පමණක් නොව මෙරට සෞඛ්‍ය ක්ෂේත්‍රය ගැන අවධානයෙන් බලන කළ පෙනී යන්නේ බොහෝ ධානපතියන් පින් පිණිස ඔවුන්ගේ දේපළ රෝහල් ඉදිකිරීමට පරිත්‍යාග කර ඇති බවය. එයට කදිම උදාහරණ වන්නේ ද සොයිසා කාන්තා රෝහල, කාසල් විදීයේ කාන්තා රෝහල සහ රිජ්වේ ආර්යා රෝහල පෙන්වා දිය හැකිය. අදටත් බොහෝ රෝහල්වල අඩුපාඩු පියවා ගැනීම සඳහා ධානපතියන් උදව් කරන බව රහසක් නොවේ.
එහෙව් වටපිටාවක සෞඛ්‍ය සහ ජනමාධ්‍ය අමාත්‍යවරයා ඇට මිදුළු බද්ධ කිරීමේ ගොඩනැඟිල්ල විවෘත කරමින් ධානපතියන් මෙරට සෞඛ්‍ය නඟා සිටුවීම සඳහා ලබාදෙන ආධාර අනාගතයේ රජයට බරක් විය හැකි බව කීම පුදුම සහගතය. ඔහු පවසන අන්දමට මෙවර අයවැයෙන් මෙරට සෞඛ්‍ය පද්ධතිය නඟා සිටුවීම සඳහා ලොකුම මුදල වෙන් කරන බව කීම පුරසාරම් දෙඩීමක් වැන්න. එම නිසා සෞඛ්‍ය පිළිබඳ මනා අවබෝධයක් ඇතැයි සිතන සෞඛ්‍ය සහ ජනමාධ්‍ය අමාත්‍යවරයානෙණි කට අරින්නට පෙර කියන්නේ කුමක්දැයි දෙපාරක් සිතන්න.
