නිරෝගීකම තරම් පරම සැපතක් මෙන්ම පරම ලාභයක් මෙලොව නොමැති බව අපි හොඳින්ම දනිමු. ඒ නිසා රටක ජනතාවගේ නිරෝගීකම කෙරෙහි බලපාන රටේ සෞඛ්‍ය පද්ධතියේ ඇති වන හොඳ සහ නරක පිළිබඳව නිරන්තරයෙන් නවලිය අවදියෙන් සිටින්නෙමු. ඒ අනුව බලන කල දැන් මේ රටේ සෞඛ්‍ය පද්ධතිය ඇත්තේ මරණාසන්නයේ බවක් අපටද වැටහෙමින් පවතී. එයින් ගොඩ ඒමට කිසිසේත්ම නොහැකි බව පෙන්වන අනාවරණයක් පසුගියදා කරනු ලැබුවේ රජයේ වෛද්‍ය නිලධාරීන්ගේ සංගමයයි. ඔවුන් පවසන්නේ දැනට මෙරට රාජ්‍ය රෝහල්වල පවතින ඖෂධ හා එන්නත් හිඟය ලබන වසරේදී මීටත් වඩා දරුණු තත්ත්වයට පත්විය හැකි බවකි.
එයට හේතුව ලෙස ඔවුන් පෙන්වා දෙන්නේ සෞඛ්‍ය අමාත්‍යංශය විසින් ඖෂධ මිලදී ගැනීමේ සම්මත ක්‍රියාවලියෙන් බැහැරව යමින් හදිසි ඖෂධ මිලදීගැනීමේ ක්‍රියාවලිය නිසා මෙරට ඖෂධ අවුල මේ වනවිට අවුලෙනුත් අවුලට පත්ව ඇති බවයි. එම නිසා ජනතාවගේ ජීවත්වීමේ අයිතියද වර්තමාන සෞඛ්‍ය අමාත්‍යවරයා සහ සෞඛ්‍ය ආමත්‍යංශය උදුරාගෙන ඇතැයි ද රජයේ වෛද්‍ය නිලධාරීන්ගේ සංගමය චෝදනා එල්ල කරයි.
හදිසි ඖෂධ මිලදීගැනීම් වලින් රුපියල් මිලියන ගණනක ලාභයක් ලැබූ බවට සෞඛ්‍ය අමාත්‍යවරයා පුරසාරම් දෙඩෙව්වත් සංගමය පෙන්වා දෙන්නේ රුපියල් සීයට ගත හැකි ඇතැම් බෙහෙත් සඳහා සාම්ප්‍රදායික ක්‍රියාවලියෙන් පිට පන්නා කළ හදිසි මිලදීගැනීම් නිසා රුපියල් දහසක් වැනි ලොකු මුදලක් එක පෙත්තක් මිලදී ගැනීම සඳහා ඔවුන් ගෙවා ඇති බවකි.
මෙහි ප්‍රතිඵලය වශයෙන් ඖෂධ මිලදී ගැනීමට රජය සහ භාණ්ඩාගාරයෙන් වෙන් කළ මුදල් බෙහෙත් කිහිපයක් පමණක් ගැනීමට සීමාවීම, ප්‍රමිතිගත ආයතනවලින් තොරව ඖෂධ කඩවලින් ඖෂධ මිලටගැනීම නිසා බාල ඖෂධ සහ එන්නත් මෙරටට පැමිණ තිබීම, අත්‍යවශ්‍ය ඖෂධ සහ ප්‍රමිතිගත ඖෂධ නොමැතිවීම නිසා
රෝගීන් අසරණවීමේ බාල ඖෂධ රෝහල්වල ඇතැයි යන සැකය නිසා බොහෝ රෝගීන් මරණාසන්නව සිටියත් ඖෂධ සහ එන්නත් රජයේ රෝහල්වලින් ලබාගැනීමට බිය වීම වගේම පොඩි දරුවන්ට ලබාදෙන ප්‍රතිශක්තිකරණ එන්නත් ලබාදීම පවා ප්‍රතික්ෂේප කිරීම දැනටමත් සිදුව ඇත.
මේ වනවිටත් ලංකාවෙන් තුරන් වෙමින් තිබුණු සරම්ප වැනි බෝවන රෝග මෙන්ම මොළේ උණ වැනි රෝග තත්ත්වයන් පවා වැඩි වෙමින් ඒවායින් පෙළෙන දරුවන් කොළඹ රිජ්වේ ආර්යා ළමා රෝහලෙන් වැඩි වශයෙන් ප්‍රතිකාර ලබාගන්නා බවත් රෝහලේ විශේෂඥ වෛද්‍යවරුන් ප්‍රකාශ කර තිබේ. මෙවන් තත්ත්වයක් තුළ රජයේ වෛද්‍ය නිලධාරීන්ගේ සංගමය පවසන ඉහත කාරණා පිළිබඳ ජනාධිපතිවරයාගේ අවධානය වහා යොමු විය යුතු අතර රජය ක්‍රියාත්මක නොවන්නේනම් එක් පුද්ගලයෙකුගේ අත්තනෝමතික තීරණ නිසා රටේ සමස්ත සෞඛ්‍ය පද්ධතියත් එය භුක්ති විඳින ජනතාවත් පණ අදිමින් හෝ නොසිට වහා මියයනු ඇත.
පණ අදින සෞඛ්‍යය
Leave a comment
