සාමාන්‍යයෙන් මිනිස්සු පනා පාවිච්චි කරන්නෙ තමන්ගෙ කොණ්ඩෙ පීරලා පිළිවෙළකට තියාගන්න. අවුරුදු පන්දාහක් විතර ඈත අතීතයකට හිමිකම් කියන පනාව මේ වෙද්දි විවිධාකාරයෙන් පරිණාමය වෙලා තියෙනවා. ගෑනු ළමයින්ට මූණට, අතට, කකුලට එක එක වර්ගයේ ක්‍රීම් වගේ කොණ්ඩෙත් විවිධාකාර පනා පාවිච්චි කරනවා. ප්‍රධාන වශයෙන් කොණ්ඩ ගැට ලෙහාගෙන කොණ්ඩෙ ලස්සනට තියාගන්න පනා පාවිච්චි කළත් විවිධ කොණ්ඩ විලාසිතා වෙනුවෙනුත් විවිධ පනා පාවිච්චි කරනවා.
ප්‍රධාන වශයෙන් Hair brush, Shampoo comb, Teasing comb, Tail comb,Cutting comb, Jumbo hand comb,Curved End comb තමයි මූලික වශයෙන් හඳුන්වලා දීලා තියෙන පනා වර්ග වෙන්නේ. මේ අතරින් මුලින් කිව්වා වගේ කොණ්ඩෙ තියෙන ගැට ටික ලෙහාගන්න වගේම සාමාන්‍ය විදිහට කොණ්ඩෙ පීරගන්නෙ Hair brush එකෙන්.
Shampoo Comb
ෂැම්පු කෝම්බ් එකේ දැති තරමක් විශාලයි. කොණ්ඩෙ ෂැම්පු කළාට පස්සෙ පීරන්නයි ෂැම්පු කොම්බ් එක භාවිත කරන්නේ. ෂැම්පු කෝම්බ් එකේ තියෙන විශේෂත්වය තමයි හිස්කබලට හොඳ සම්බාහනයක් ලබාදීම. මේ සම්භාහනයේදී හිස් කබලට ඔක්සිජන්, රුධිරය සහ පෝෂ්‍ය පදාර්ථ සංසරණය වැඩි කරනවා.
මේ සියලු දෑ සෞඛ්‍ය සම්පන්න හිසකෙස් වර්ධනයට බෙහෙවින් බලපානවා. ලංකාවේ වෙළෙඳපොළේ නම් කොහොඹ ලීයෙන් හදපු ෂැම්පු පනාත් තියෙනවා. හිස්කබල සම්බාහනය කරනවා වගේම හිස කෙස් පුරා ෂැම්පු බෙදා හැරීමත් ෂැම්පු කෝම්බ් එකෙන් වෙන කාර්යයක්.
Teasing Comb
ටීසින් කෝම්බ් එක ඔබ බොහෝ වෙලාවට රූපලාවන්‍යාගාර වල දැකලා ඇති. මේ පනාවෙන් කරන්නේ ඔබේ හිස කේස් කොටස් වශයෙන් බෙදා පීරන එක. බොහෝ වෙලාවට කොණඩ මෝස්තරයක් දාද්දි හසරුවෙන් (Handle) හිසකෙස් වෙන් කිරීම සිදුකෙරෙනවා. Backcomb කියන ප්‍රසිද්ධ කොණ්ඩ විලාසිතාව සඳහා මෙය යොදාගන්නවා.
Tail Comb
ටේල් කෝම්බ් එකත් ටීසීන් කෝම්බ් එකට ගොඩාක්ම සමානයි. කොණ්ඩ මෝස්තරකරුවන් අතර ප්‍රියතම පනාවක් විදිහට ටේල් කෝම්බ් එක හඳුන්වන්න පුළුවන්. හිසකෙස් වර්ණ ගැන්වීමේදී හිසකෙස් කොටස් වෙන් කරගැනීමට තමයි මේ ටේල් කෝම්බ් එක යොදාගන්නේ.
Cutting Comb
කොණ්ඩේ කපන අවස්ථාවකදී කතුරත් එක්කම භාවිත වෙන පනාව තමයි මේ. කටින් කෝම්බ් එකේ කොටස් දෙකක් තියෙනවා. ඉන් සිහින් නැති සහිත කොටස කොණ්ඩේ කපන අවස්ථාවේදී භාවිත කරන අතර දැති තරමක් මහත කොටස කොණ්ඩය ලෙහා ගන්නට භාවිත කරනවා.
Jumbo Hand Comb
අනෙක් සියලුම පනාවලට වඩා බෙහෙවින් විශාල දැති සහිත මේ පනාව ඕන වෙන්නේ ඝණ, දිගු කෙස් කලඹක් තියෙන අයට. ඒ වගේම කොණ්ඩෙ ගොඩක් තියෙන අයට කෙස් ගස් ගැලවී යාමකින් තොරව පරිස්සමෙන් තමන්ගේ කොණ්ඩෙ පීරගන්න පුළුවන්. කැරලි සහිත කොන්ඩයකටත් හොඳින්ම ගැළපෙනවා.
Curved End Comb
සාමාන්‍ය පනාවකට වඩා වක්‍රාකාරව නිර්මාණය වුණ මේ පනාව මනමාලියන්ගේ කොණ්ඩ මෝස්තර වෙනුවෙන් විශේෂයෙන්ම යොදාගන්නවා. සාම්ප්‍රදායික පැතලි පනාවකට වඩා මේ හැඩයේ පනාවකින් මුළු කොණ්ඩයම පහසුවෙන් ආවරණය කරගත හැකියි.මේ පනාවලට අමතරව තවත් පනා කිහිපයක් තියෙනවා. නමුත් අපේ එදිනෙදා ජීවිතේදි බහුලව භාවිතයට ගන්න මේ පනා අද ඉඳලා ගැළපෙන අවස්ථාවලදී ගැළපෙන විදිහට භාවිතයට ගන්න.
එරංදි කෞශල්‍යා ✍️
