අයිලෑෂ් එක්ස්ටෙන්ෂන් කියන්නෙ ඇහිබැමි දිගුකර වඩාත් සම්පූර්ණ පෙනුමක් ලබාදීම සඳහා ජනප්‍රිය ප්‍රවේශයක්. ඒ පිළිබඳ මනා දැනුමක් සහිත ශිල්පියකු විසින් නිවැරදිව යොදන විට ඇහිබැමි දිගු කිරීම ආරක්ෂිතව, අලංකාරවත්ම සිදුකර ගත හැකියි. කෙසේ වෙතත් වැරදි මැලියම් භාවිත කිරීමෙන් ඇහිබැමි වේදනාව, ආසාදන ඇති විය හැකියි. අයිලෑෂ් එක්ස්ටෙන්ෂන් එකකින් වෙන්නෙ ඔබේ ස්වභාවික ඇහිබැමි රේඛාවට ඉහළින් දිග, ගණ කෘතිම ඇස් පිහාටු ඇලවීමක්. ඇයිලෑෂ් එක්ස්ටෙන්ෂන් එකක අරමුණ වෙන්නේ මස්කාරා හෝ වෙනත් අක්ෂි වේෂ නිරූපණයකින් තොරව ඇස්වලට සාධනීය පෙනුමක් ලබාදීමයි.
ප්‍රධාන වශයෙන් අයිලෑෂස් කොටස් තුනකට බෙදෙනවා
- ක්ලැසික් – ස්වාභාවික පෙනුම.
- වොලියුම් – අයිලෑෂස්වල තීව්‍රතාවය වැඩි කිරීම.
- හයිබ්‍රිඩ් – ස්වභාවික පෙනුම සහ වැඩි ත්‍රීව්‍රතාවයන්හි එකතුවක්.
ඇයිලෑෂ් එක්ස්ටෙන්ෂන් කරනා පියවර
ප්‍රථමයෙන්ම ඔබේ ඇස් දෙකම රූපලාවණ්‍ය ශිල්පියා විසින් පිරිසිදු කරනු ලබනවා. පසුව ට්වීසර් හෝ ඒ හා සමාන මෙවලමක් භාවිත කරමින් ස්වාභාවික ඇහිබැමි වෙන්කර ඇහැ පිහාටු අඩු තැන් සොයාගෙන, තනි කෘතිම ඇහිබැමි තන්තුවක් මැලියම්වල සීරුවෙන් ගිල්වා හුදකලා ස්වාභාවික ඇහිබැමි මුදුනට සවි කරනු ලැබයි. මිනිත්තු කිහිපයකට පසුව මැලියම් හොඳින් වියළේ. අයිලෑෂ් එක්ටෙන්ෂන් එක කරන්න භාවිත කරන්නේ සයනොඇක්‍රිලේට් නම් වූ මැලියම් වර්ගයක්.
ගතවෙන කාලය
සාමාන්‍යයෙන් එක් පුද්ගලයෙක් වෙනුවෙන් පැය එකහමාරක් පමණ ගතවෙනවා. එය ශිල්පියාගේ දැනුම සහ පළපුරුද්ද මත තීරණය වෙනවා.
අයිලෑෂස් නඩත්තුව අපහසු නෑ
අයිලෑෂස් නඩත්තුව අමාරු නෑ. නිවැරදි පිළිවෙළට කිරීමෙන් සති දෙකක් තුනක් හොඳින් පවත්වාගත හැකියි.
කෘතිමව ගැලවී යන්නට ඉඩදෙන්න
අයිලෑෂ් එක්ස්ටෙන්ෂන් ඉවත් කිරීමට ඇති ආරක්ෂිතම ක්‍රමය ඒවා ස්වභාවිකවම වැටීමට ඉඩදීම. අමෙරිකානු ඇහිබැමි විශේෂඥවරියක වන ක්ලෙමෙන්ටිනා රිචඩ්සන් සාකච්ඡාවකදී පවසා තිබුණේ ඇහිබැමි තමන්ම ඉවත් කිරීමට උත්සාහ කිරීමේ ප්‍රතිඵලයක් ලෙස කාලයක් ගත වනවිට තට්ට ලප (හිසේ තැනින් තැන හිසකෙස් හැලීයාම) ඇති විය හැකි බවයි.
එම ස්ථානයන්හි නැවත හිසකෙස් වර්ධනය වීමේ හෝ නොවීමේ ප්‍රවණතාවයක් පවති. ඒ හේතුවෙන් කෘතිම ඇස් පිහාටු පිරිසිදුව තබාගනිමින් ස්වභාවිකවම ගැලවී යන තෙක් තමන්ම ගලවීම යාම නොකළ යුතුයි.
සාමාන්‍යයෙන් සති හයේ සිට අට දක්වා කාලය තුළ ස්වභාවිකවම වැටෙනු ඇත. ඇහිබැමි මැලියම් ලිහිල් කිරීමට තෙල් මත පදනම් වූ පිරිසිදුකාරක හෝ ක්‍රීම් භාවිත කිරීමෙන් ඔබට එක්ස්පීරියන්ස් ඉවත් කිරීමේ ක්‍රියාවලිය වේගවත් කරගැනීමට හැකියි. නමුත් එය ක්ෂණික විසඳුමක් නොවේ.
මුල් වරට අයිලෑෂස් කරපු කෙනෙක් පැය 24 ක් ඒවා ස්පර්ශ කිරීමකින් වැළකිය යුතුයි. පැය 48 ක් ඒවා තෙමීමකින් තොරව තබාගත යුතුයි. එසේ කිරීම අවශ්‍ය වන්නේ ඒවා ඇහි පිහාටුවට හොඳින් සවිවීම සඳහායි. මස්කාරා ද නොගැල්විය යුතුයි. එක්ස්ටෙන්ෂන්වල නොගෑවෙන පරිදි අයි ෂැඩෝ භාවිත කරමින් අයිමේක්අප් එකක් කරගත හැකියි.
අයිලෑෂස් පිරිසිදු කරගැනීම
දිනපතා පිරිසිදු කිරීම අත්‍යවශ්‍යයි. ඒ සඳහා වෙළෙඳපොළේ සෙමි පර්මනන්ට් අයිලෑෂස් ක්ලීනින් ෂැම්පු වර්ග තිබෙනවා.
මැලියම් ඇසට අහිතකරද?
ඇමරිකානු අක්ෂි වෛද්‍ය ඇකඩමිය විසින් කරන ලද පර්යේෂණයකින් හෙළි වූයේ ඇහිබැමි මැලියම්වල ඇති ඇතැම් රසායනික ද්‍රව්‍යවලට දිගු කලක් නිරාවරණය වීමෙන් ඇස් රතු වීම, කඳුළු ගැලීම වැනි අපහසුතා ඇතිවිය හැකි බවයි. නිසි සැලකිල්ලක් නොමැති වුවහොත් මෙය වඩාත් බරපතළ අක්ෂි රෝග දක්වා වර්ධනය විය හැකි අතර, පෙනීමේ සෞඛ්‍යයට ද අනතුරක් විය හැකියි.
All about vision ඇසුරින්
එරංදි කෞශල්‍යා 
