කෝමාරිකා කියන්නෙ විශ්මිත ඔසුවක් බව කවුරුත් දන්නා කරුණක්. කෝමාරිකා ජෙල් වල විටමින් C සහ E, බීටා-කැරොටින් බහුලව තියෙනවා. ඒ නිසා එය වයස්ගත වීම වැළැක්වීමේ ගුණයෙන් බහුලයි. ඊට අමතරව අපිට කෝමාරිකා එදිනෙදා ජීවිතයේදී බොහෝ රූපලාවන්‍ය කටයුතු සඳහා යොදාගත හැකියි. ඒ මොනවද කියල ඔබට මේ ලිපිය කියවා දැනගන්න පුළුවන්.
■ අඳුරු ලප සහ ඇක්නි වලට
කෝමාරිකා පිත්තක් ගෙන එය හොඳින් සෝදා මදේ සූරා ජෙල් එකක් ආකාරයට සැකසෙනතෙක් බ්ලෙන්ඩ් කරගන්න. එය භාජනයකට දමා ටිෂූ එකක් ගෙන කෝමාරිකා ජෙල් එකේ පොඟවා මුහුණේ එය අලවාගෙන විනාඩි 15 පමණ තිබෙන්නට හරින්න. සතියට තුන්පාරක් කිරීමෙන් ප්‍රතිඵල ලබාගත හැකියි.
■ හිසකෙස් වර්ධනයට
කෝමාරිකා ජෙල් හිස්කබලේ රුධිර සංසරණය වැඩි කරනවා කියල ඔයාල දන්නවද? අලුත් හිසකෙස් වර්ධනය සක්‍රීය කිරීමේ හැකියාවක් කෝමාරිකා වලට තියෙනවා. ඒ වගේම හිස්කබලට අත්‍යවශ්‍ය ඛනිජ සහ විටමින් ද සපයනවා. කෝමාරිකාවල ප්‍රෝටියෝලයිටික් එන්සයිම අඩංගු වන අතර එය හිස්කබලේ මියගිය සම යථා තත්ත්වයට පත් කිරීමට උපකාරී වෙනවා. එබැවින් කාන්තාවන්ගේ සහ පිරිමින්ගේ හිස්කබලේ ගැටලු සඳහා කෝමාරිකා විශිෂ්ට පිළියමක්.
■ හිස්හොරි වලට තිත
භාජනයක් ගෙන කෝමාරිකා මදෙන් තේ හැඳි තුනක් පමණ සූරා දමාගෙන තමන් භාවිත කරන කන්ඩිශනර් ස්වල්පයක්, ඔලිව් ඔයිල් හා පොල්තෙල් සියල්ල ඊට දමා හොඳින් කලවම් කරගන්න. පසුව හිසකෙස් මුල ගෑවෙන ලෙස හොඳින් ගල්වාගන්න. පැය භාගෙකට පසුව සෝදාහරින්න.
■ කෝමාරිකා Scrub
පිරිසිදු කෝමාරිකා මද තේ හැඳි දෙකක් සහ හාල්පිටි තේ හැඳි දෙකක් භාජනයකට දමා හොඳින් කලවම් කරගන්න. පසුව ස්පැචියුලා එකක් ආධාරයෙන් මුහුණේ සෑමතැනකම ආලේප කර ස්වල්ප වේලාවකින් සෝදා හරින්න.
■ මේකප් ඉවත් කරගැනීමට
කෝමාරිකා මද අවශ්‍ය ප්‍රමාණයට ගෙන එයට මී පැණි තේ හැඳි දෙකක් හා පොල්තෙල් තේ හැඳි දෙකක් එකතු කර හොඳින් කලවම් කරගන්න. පසුව මේක්අප් සහිත ප්‍රදේශයේ ගල්වා විනාඩියක් පමණ තිබෙන්නට හැර ටීෂූ කඩදාසියකින් පිසදාගන්න.
■ කෝමාරිකා මොයිස්චර්
කෝමාරිකා පිත්තක් ගෙන හොඳින් සෝදා මදය ඉවත් කරගෙන කැබලි නොතිබෙන සේ බ්ලෙන්ඩ් කරගන්න. ජලය මිශ්‍ර නොකිරීමට වගබලාගන්න. පසුව එම මිශ්‍රණය අයිස් කැට රඳවනයට දමා කූල් වෙන්නට හැර අවශ්‍ය වෙලාවට ගෙන ශරීරයේ අවශ්‍ය තැනක ආලේප කරගන්න.
■ බඩ වැඩි අයට…
පිපිඤ්ඤා කැබැල්ලක්, ඉඟුරු කැබැල්ලක්, දෙහි ස්වල්පයක් හා කෝමාරිකා යුෂ මේස හැඳි පහක් පමණ ගෙන හොඳින් බ්ලෙන්ඩ් කර උදෑසන හිස් බඩ පානය කරන්න.
■ අව් රශ්මිය සඳහා
ශීත කළ කෝමාරිකා ජෙල් දිනකට දෙතුන් වතාවක් හිරු රශ්මියෙන් පිළිස්සී ගිය ප්‍රදේශයේ ගල්වන්න. සමේ වර්ණය සාමාන්‍ය තත්ත්වයට පත් වන තෙක් භාවිත කරන්න. ඔබට සම ප්‍රමාණ ලෙස කෝමාරිකා හා වතුර මිශ්‍ර කර ස්ප්‍රේ එකක් සාදා භාවිත කිරීමට හැකිය. එසේ සකසාගත් ද්‍රාවණය ශීතකරණය තුළ තබාගෙන අවශ්‍ය වෙලාවට ගෙන ආලේප කරගන්න. ඇස්වල ගල්වාගැනීමෙන් වළකින්න.
(Be beautiful ඇසුරෙන්)
එරංදි කෞශල්‍යා
