ශ්‍රී ජයවර්ධනපුර විශ්වවිද්‍යාලයීය මානවශාස්ත්‍ර හා සමාජීයවිද්‍යා පීඨයේ සිංහල හා ජනසන්නිවේදන අධ්‍යයනාංශයේ සිංහල විෂය හදාරන සිසු සිසුවියන්ගේ කාව්‍ය නිර්මාණ ඇතුළත් “කාව්‍යාවලී ” කාව්‍ය සංග්‍රහය දොරට වැඩීමෙ උත්සවය විශ්වවිද්‍යාලයීය සුමංගල සභාසදයේදී පැවැත්විණ. ඊට සමගාමිව AI තාක්ෂණය ඇසුරින් නිර්මාණය කළ ගීත සමුච්චයක්ද එළි දැක්වීම එදිනම සිදුවිය.
මේ ගීතවල ගේය පද රචනය සිදු කර ඇත්තේ සිංහල විශේෂවේදි සිසු සිසුවියන් වන අතර සංගීතය හා ගායනය AI තාක්ෂණයෙන් සිදු කර ඇත. ඉන් එක් ගීතයක් සජීවව සිසුවියක විසින් ගායනා කරන ලද අතර ජයග්‍රාහී නිර්මාණ සඳහා සම්මාන ඵලක හා මුදල් ත්‍යාග පිරිනැමිමද සිදුවිය.
ශ්‍රී ලංකාතිලක මහින්ද කරුණාරත්න, මානවශාස්ත්‍ර හා සමාජීයවිද්‍යා පීඨාධිපති මහාචාර්ය ශිරාන්ත හීංකෙන්ද, සම්මානිත කිවිවර බුද්ධදාස ගලප්පත්තති, රංජිත් මල්ලියාවඩු, මහාචාර්ය කුසුමලතා ලංකාමුල්ල, මහාචාර්ය ප්‍රණීත් අභයසුන්දර ආදින්ගේ ප්‍රධානත්වයෙන් උත්සවය පැවැත්විණි.
එහිදී “ශ්‍රී ලංකාතිලක මහින්ද කරුණාරත්න සම්මාන” ද්විත්වයත්, බුද්ධදාස ගලප්පත්ති සාහිත්‍ය සම්මානයත්, හේම නලින් කරුණාරත්න අනුස්මරණ සම්මානයත් පිළිවෙළින් ප්‍රශස්ත පද්‍ය කාව්‍ය රචනය, ප්‍රශස්ත පද්‍ය විචාරය, දක්ෂතම ගේය කාව්‍ය රචනය සහ නිර්මාණාත්මකම රූපරචනය උදෙසා පිරිනැමිණි.
එම වැඩසටහන ආචාර්ය හංසමාලා රිටිගහපොළගේ මෙහෙයවීමෙන් සිදුකෙරුණු අතර සිංහල විෂයය හදාරන තෙවන වසර විද්‍යාර්ථයින් විසින් සංවිධානය කරන ලදි.
හරින්දී ලියනගේ ✍️
