අවශ්‍ය ද්‍රව්‍ය
- හාල්පිටි ග්‍රෑම් 500
- තම්බපු පාන්පිටි ග්‍රෑම් 200
- සීනි ග්‍රෑම් 250
- පැණි බෝතල් 3/4
- පොල්කිරි කෝප්ප 1/2
- රස අනු ලුණු
- බැදගැනීමට තෙල්
සාදාගන්නා ආකාරය
භාජනයක් ළිප තියා පැණි, සීනි හා පොල්කිරි දාලා උණු කරගන්න. ළිපෙන් බාලා නිවෙන්න තියන්න. මේකට වෙන වෙනම හලාගත්ත පාන්පිටි හා හාල්පිටි එකතු කරලා අනාගෙන පැය 8 ක් වගේ වහලා තියන්න. දැන් උණුවතුර කෝප්ප එකක් නිවෙන්න තියලා ඒකෙන් ටික ටික දාලා මිශ්‍රණය හදාගන්න.
උකුමත් නැති දියාරුමත් නැති මිශ්‍රණයක් හදාගන්න. තෙල් තාච්චිය ළිපේ තියලා තෙල් හොඳට රත්වූ පසු පිටි මිශ්‍රණයෙන් ටිකක් පොඩි උල් කටක් තියෙන කෝප්පෙකට දාගන්න. මේ කෝප්පෙ එක කැවුමකට ඇති වෙන සයිස් එකක් නම් ඔයාලට වැඩිය ලේසියි. කෝප්පෙ උල් කට පැත්තෙන් තාච්චියේ අඩියට මිශ්‍රණය වක්කර ගන්න.
ඒ වක්කරපු මිශ්‍රණය උඩට තෙල් හැන්දෙන් වටේ තියෙන තෙල් ඉසගන්න. වටෙන් මිශ්‍රණය තැම්බිලා මැද පිම්බෙන කොට ඉරට්ටක් අරගෙන කැවුමෙ මැද්දෙන් තියලා කරකවමින් තෙල් ඉහින්න. එතකොට පෙනෙයි කැවුමෙ කොණ්ඩෙ හැදිලා එනවා.
