නාසා අභ්‍යවකාශ මධ්‍යස්ථානය විසින් අඟහරු හෙවත් රතු ග්‍රහයා වෙත සිදු කරන ගවේශන කටයුතු වෙනුවෙන් ශ්‍රි ලාංකික කාන්තාවක්ද ඇතුළත් වී සිටිනවා. ඇය නමින් පියුමි විජේසේකරයි.
මැයි මස 10 වැනි දින අඟහරු ගවේශනය වෙනුවෙන් නාසා ආයතනය විසින් සිව් දෙනෙකුගෙන් යුක්ත කණ්ඩායමක් තෝරා ගෙන ඇති අතර ශ්‍රි ලංකාවේ කාන්තාවක් වන ආචාර්ය පියුමි ඒ අතරට එක්වීම අපේ රටට අභිමානයකි. ඇය සමග ජේසන් ලී, ස්ටෙෆනි නවාරෝ, ෂරීෆ් අල් රොමේති මෙම ගවේශන චාරිකාවට සහභාගී වීමට නියමිතව ඇත.
මේ සියලුදෙනාම ස්වේඡාවෙන් මෙම චාරිකාවට සම්බන්ධ වන අතර ඉල්ලුම් කළ අය අතරින් මෙම සිව්දෙනා සුදුසුකම් ලබා ඇත. මෙම කණ්ඩායම දින 45 ක් ගගනගාමීන් ලෙසින් ජීවත් වන අතර ජූනි මස 24 වැනි දින නැවත පෘථිවියට පැමිණීමට නියමිතව තිබේ. මෙම මෙහෙයුම අනාගතයේදී චන්ද්‍රයා සහ අගහරු වෙත සිදු කරන ගවේශනයන් වෙනුවෙන් වූ පූර්ව අධ්‍යයනයක් ලෙස සලකනු ලබනවා.
පියුමි විජේසේකර මහත්මිය කැලිෆෝනියාවේ සිලිකන් නිම්නයේ නාසා එම්ස් (NASA Ames Research Centre) පර්යේෂණ මධ්‍යස්ථානයේ ජෛව භෞතික විද්‍යාගාරයේ උපාධි පර්යේෂණ විද්‍යාඥවරියක ලෙසින් කටයුතු කරනවා.
2015 වසරේදී ඇමරිකා එක්සත් ජනපදයේ සැන්ඩියාගෝ හි කැලිෆෝනියා විශ්වවිද්‍යාලයෙන් ජෛව ඉංජිනේරු විද්‍යාව පිළිබඳ උපාධිය ලබා ගත් අතර 2017 වසරේදී පිට්ස්බර්ග්හි කානගී මෙලන් විශ්වවිද්‍යාලයෙන් ජෛව වෛද්‍ය ඉංජිනේරු විද්‍යාව පිළිබඳ ශාස්ත්‍රපති උපාධිය ලබාගෙන ඇත.
ඇගේ ආචාර්ය උපාධි පර්යේෂණය වෙනුවෙන් ශ්වසන රෝග අධ්‍යයනය කිරීම වෙනුවෙන් ඉංජිනේරු පෙනහළු ආකෘති වෙනුවෙන් අවධානය යොමු කර තිබේ. කඳු නැගීම, පොත් පත් කියැවීම, සංගීත සංදර්ශන නැරඹීම ඇගේ විනෝදාංශ වේ.
NASA ආයතනය විසින් අඟහරු ග්‍රහයා වෙනුවෙන් පළමු කණ්ඩායම 2024 වසරේ මාර්තු මස 18 වැනි දින යවන ලදී. මේ දෙවන කණ්ඩායම වන අතර 2024 වසරේ දෙසැම්බර් 20 වැනි දින වන විට තවත් කණ්ඩායම් දෙකක් අඟහරු ග්‍රහයා වෙත යැවීමට සූදානම් කර තිබේ.
( FT Daily ඇසුරෙන්)
පුන්‍යා චාන්දනී ද සිල්වා ✍️
