විදූෂනීගේ මල්වත්තේ Photoshoot කරන්න යන්න

මල් දෙන්නෙ ආදරෙටලු. මේ ලෝකේ මල්වලට එක එක්කෙනා එක එක තේරුම් දෙනවා. ඒ අතරින් සූරියකාන්ත මල් කියන්න විශේෂ මල් ජාතියක්. ඒක නිකම්ම නිකම් මලක් නෙවෙයි. එක ඉරක් වෙනුවෙන් හැමදාම බලන් ඉන්න මලක්. ඉර හැරෙන පැත්තට බෑ නොකියා හැරෙන මලක්.

සූරියකාන්ත මල දුටුවන් පිනායන විශාල කහ පැහැති මලක්. සූරියකාන්ත මල් වත්තක් කියන්නෙ දිව්‍යලොකයක් වගේ තමා ඉතින්. අන්න ඒ වගේ දිව්‍යලොකයක් අපිට හමවුණා.

ඒ අපේ ලංකාවේ යාපනයේ අරාලි ගම්මානයෙන්.මේ ලස්සන මල්වත්තේ අයිතිකාරිය විසිහය හැවිරිදි මානික්කපිල්ලේ විදූෂනී. ඇය යාපනය විශ්වවිද්‍යාලයේ උපාධිධාරිණියක්. උපාධිය හදාරා ඇත්තේ කලමනාකරණ විෂයන්ගෙන්.

මේ වනවිට ඇගේ නැගණියත් උසස් පෙළ විභාගයෙන් සමත්ව නිවසේ ඉන්නවා. මෙහෙම ඉන්න ගමන් විදූෂනි නංගිත් එක්ක ගෙදර පිටිපස්සෙ තියෙන ඉඩකඩේ සූරියකාන්ත මල් වවන්න අරන්. මුලින්ම නම් විනෝදෙටයි අතට සල්ලී කීයක් හරි ගන්න එකයි මෙයාලගේ අරමුණ වෙලා තියෙන්නේ.

විදූෂනි කුඩාවට පටන් ගත්ත සූරියකාන්ත මල් වගාව මේ වෙනකොට විශාල පරිමාණයෙන් වගාකිරිම් සිදුකරනවා. ඈ පවසන පරිදි සූර්යකාන්ත මල්වල ඇට කිලෝ එකකට ඉන්දියාවෙදි රුපියල් 3000 ත් 4000 ත් අතර මිලක් ගන්න පුළුවන්ලු.

මේ වගාවෙන් ඇය සූර්යකාන්ත මල් ඇට කිලෝ 25000 ත් 40000 ත් අතර ප්‍රමාණයක් ගන්න බවත් ඇය පවසනවා. යාපනය ඉන්දියව අතර නැව් සේවාවක් තිබෙන නිසා ඇය ඒ හරහා ඉන්දියාවට යවන්න පටන් ගෙන තියෙනවා.

ඉතින් පොඩියට පටන්ගත්ත මේ මල්වත්ත අද වෙනොකොට විශාල අලංකාර මල් වත්තක් වෙලා. සූරියකාන්ත මල්යායේ තියෙන සුන්දරත්වය නිසාම ඕනෑම පුද්ගලයකු මේ සූරියකාන්ත මල්වත්ත ගැන ඇතිවන හැගිම සුළුපටු නෑ. ඒ නිසාම මේ මල්වත්ත ෆොටෝ ගහන අයට ෆොටෝ ශූට් කරන්න කලාගාරයක් වෙලා තියෙනවා.

වෙඩින්වලට, ෆ්‍රී ශූට්වලට ගොඩ දෙනෙක් මේ ලස්සන සූරියකාන්ත මල් වත්තට එනවා කියලයි ආරංචි.විදූෂනිගෙ අරමුණ වෙලා තියෙන්නෙ දිගටම යාපනයේ සූර්යකාන්ත මල් වගා කරන්න.

ඇගේ මේ ලස්සන සූරියකාන්ත මල්වත්ත ධෛර්යයවන්ත දියණියක් තම ජීවිතය සාර්ථක කරගන්න කරනු ලැබු නොපසුබට උත්සාහයක ප්‍රතිඵලයක් කියලයි අපිට හිතෙන්නේ.

නිපුනි සම්මානි ✍️