2025 කියන්නේ ජුබිලි අවුරුද්දක්. මේ එළඹෙන නව වසර සතුටෙන් සාමදානයෙන් ඉන්න අපි හැමෝම කැමතියි. අලුත් වසර ගතවෙන්නේ කොහොමද දියුණු වෙන්නෙ කොහොමද බාදක කරදර ඇතිවෙන වසරක්ද කියලා අපි අවුරුද්ද මුලම හිතනවා. ජ්‍යෙතිෂයෙන් අපට මේ ගැන කලින් ඉදන්ම ඉඟි දෙනවා. ඒ තුළින් ඇතිවීමට නියමිත මාරකවලින් ගැලවෙන්න පුළුවන්. ඈත අතීතයේ ඉදන්ම පැවත එන මේ ශාස්ත්‍ර කලාවත් එක්ක මිනිස්සු බැඳිලා ඉන්නේ ඒ නිසයි.
මේෂ ලග්නය
රැකියාවේ දියුණුව
මේෂ ලග්නයෙන් උපන් ඔබගේ ලග්නාධිපති කුජ වක්‍ර වී හතර වැන්නේද ගුරු වක්‍ර වී දෙවැන්නටත් ආදී ලෙස පිහිටමින් 2025 වර්ෂය ආරම්භ වේ. මේෂ ලග්න හිමි ඔබට මේ වසරෙහි ධන ලාභ ලැබීම් සිදුවන වසරකි.
එහෙත් බලාපොරොත්තු නොවූ හදිසි වියදම් යෙදීමට හැකියාවක් පවතිී. 2025 වර්ෂය ඔබට රැකී රක්ෂාවල දියුණුව උදා කරන වසරක් වෙනවා. ගෘහ ජීවිතය කරදර බාධක අඩුවෙන් පැමිණෙන පවුලේ දියුණුව ඇති වන වසරකි. දරුවන්ගේ අධ්‍යාපන කටයුතුවලට තරමක් බාධා ගෙන එන වසරක්. උදරය සම්බන්ධ රෝග, පාචන රෝග, ලේ දෝෂ වැනි රෝග ඇතිවිය හැකි නිසා ප්‍රවේශමෙන් කටයුතු කළ යුතුයි.
● සුබ දබස් – ඉරිදා, අගහරුවාදා, සෙනසුරාදා
● සුබ අංක 1, 2, 5, 4, 9
වෘෂභ ලග්නය
වියදම් අධිකයි
වෘෂභ ලග්නයෙන් උපන් ඔබගේ ලග්නාධිපති සිකුරු දහ වැන්නේ ශනිත් සමගද, ගුරු වක්‍ර වී ලග්නයේද ආදි ලෙස පිහිටමින් 2025 වර්ෂය ආරම්භ වේ. 2025 වර්ෂය ඔබට තරමක් වියදම් අධික අවුරුද්දකි. එළඹෙන අවුරුද්දේ ඉතුරුම් පිළිබදව සැලකිලිමත්ව කටයුතු කළ යුතු වේ.
රැකියාවේ ගැටලු ව්‍යාපාර බිඳවැටීම් වැනි බාධක පැමිණෙන නිසා 2025 වසර තුළ කල්පනාකාරී වියයුතු වනවා. දරුවන්ගේ අධ්‍යාපන කටයුතුවලට තරමක් බාධක වන වසරකි. වසර අග විභාග කටයුතුවලට යම් අපහසුතා ඇති විය හැක. හෘද වස්තුවේ රෝග, දණහිස් කැක්කුම, අධි රුධිර පීඩනය වැනි රෝගාබාධ ඇති කරන වසරකි.
● සුබ දවස් – බදාදා, සිකුරාදා, ඉරිදා
● සුබ අංක – 6, 9
මිථුන ලග්නය
මංගල සීනු
මිතුන ලග්නයෙන් උපන් ඔබේ ලග්නාධිපති බුද හය වැන්නේද කුජ වක්‍ර වී දෙවැන්නේද ආදි ලෙස පිහිටමින් 2025 වර්ශයේ ආරම්භය සිදු වෙනවා. 2025 වර්ෂය ඔබට ලාභ ලැබෙන මූල්‍යමය දියුණුව ඇතිවන කාලයකි. නමුත් බලාපොරොත්තු රහිත මූල්‍යමය හානි ඇතිවිය හැකි නිසා ප්‍රවේශමෙන් කටයුතු කළ යුතුය. රැකියා මාරු වීම්, රැකියාවේ කීර්තියට හානිවීම්, පලදායි නොවන ආයෝජන කිරීම් සිදුවිය හැකියි.නඩු කටයුතුවලින් දිනිය හැකි කාලයකි. කාන්තා පාර්ශ්වයේ ආකර්ශනය වැඩියෙන් ලැබෙන වසරකි. පමා වූ විවාහයන් ඉක්මනින් සිදුවන වසරකි. පින්දහම් කටයුතුවලට ලැදි අයට තව තවත් එවන් කටයුතුවලට යෙදීමට වාසනාව උදාවන වසරකි. අධ්‍යාපන කටයුතුවලට යහපත් වසරකි. සෙම ආශ්‍රත රෝග, උදරාබාද, අර්ශස් වැනි රෝග තත්ත්වයන් නිසා අපහසුතා ඇතිවිය හැකියි.
● සුබ දවස් – බදාදා, බ්‍රහස්පතින්දා, සිකුරාදා
● සුබ අංක – 3, 5
කටක ලග්නය
ආදායම පහළට
කටක ලග්නයෙන් උපන් ඔබගේ ලග්නාධිපති චන්ද්‍රයා රවිත් සමග හය වැන්නේද කුජ වක්‍ර වී ලග්නයේද ආදි ලෙස පිහිටමින් 2025 වර්ෂය ආරම්භ වෙනවා. බලාපොරොත්තු නොවූ වියදම් යෙදෙන වර්ෂයකි. ආදායම සුළු වශයෙන් ඉහළ ගියත් වියදම් අධික කාලයක් නිසා ණයතුරුස් ඇතිවීමට ඉඩ පවතිනවා.
රැකියා ව්‍යාපාරයන්ට බාදා පැමිණේ. 2025 වර්ෂය තුළ ඔබ වෙනදාට වඩා ආවේගශීලීව කටයුතු කිරීමට ඉඩ ඇති නිසා ඒ ගැන සැලකිලිමත් විය යුතුය. මානසික ආතතින්ට පත්වීම්, බලාපොරොත්තු කඩවීම්, තමන් කරන කටයුතු ගැන තමන්ටම විශ්වාසයක් නොමැති නිසා ඒ කටයුතුවලට බාධා එල්ල විය හැකිය. බිරිද හෝ පෙම්වතිය සමග ගැටුම්කාරී තත්ත්ව ඇතිවිය හැකිය. විභාග කටයුතුවලට බාධා එල්ල විය හැකිය. උණ, පිත් රෝග, වමනය වැනි රෝග නිසා පීඩාකාරී තත්ත්වයන් ඇතිවිය හැකිය.
● සුබ දවස් – ඉරිදා, සදුදා
● සුබ අංක- 2, 5, 9
සිංහ ලග්නය
විභාග ජය
සිංහ ලග්නයෙන් උපන් ඔබේ ලග්නාධිපති රවි චන්ද්‍රයා සමඟ පස් වැන්නේද කේතු දෙවැන්නේද ආදි ලෙස පිහිටමින් සිංහ ලග්න හිමියන්ගේ 2025 වර්ෂය ආරම්භය සිදුවනවා. සිංහ ලග්න හිමියන්ට එළඹෙන වසර ඉතාම අධික වියදම් ඇතිවන වසරක්. කරගෙන යන රැකියාවේ හෝ ව්‍යාපාරයේ දියුණුවක් යම් මට්ටමකට තිබෙන නමුත් එය මන්දාගාමීව සිදුවනවා.
මනසට පීඩාකාරී ස්වාභවයක් සහ බලාපොරොත්තු නොවූ කරදර ඇතිවීමට හැකියි. පවුල් ජීවිතය තුළ කරදර ඇතිවිය හැකියි. නොකළ වරදකට අවනම්බු විදීමට සිදුවිය හැකිය. ඔබේ යමක් සොරකම් කිරීමක් වීමේ අවදානම පවතිනවා. සිංහ ලග්න හිමි දරුවන්ගේ අධ්‍යාපන කටයුතුවලට සුබදායකයි. තරග විභාගවලින් ජය අත්වන වසරකි. මුත්‍රාශය, ලිංග ප්‍රදේශ ආශ්‍රිත රෝගාබාධ, මහ බඩවැල ආශ්‍රිත රෝගාබාධ ඇතිවිය හැකිය.
● සුබ දවස් – ඉරිදා, බදාද, සිකුරාදා
● සුබ අංක – 1, 5, 9
කන්‍යා ලග්නය
ධන ලාභ
කන්‍යා ලග්නයෙන් උපන් ඔබගේ ලග්නාධිපති බුධ තුන්වැන්නේද රවි සදු හතරවැන්නේද ආදි ලෙස පිහිටමින් 2025 වර්ෂයේ ආරම්භය සිදුවෙනවා. මේ වසර ඔබට අධික ලාභ ලැබෙන වසරක් නමුත් ලැබීමට සමානව වියදම්ද අධිකව සිදුවන බැවින් ධනය ඉතුරු කරගැනීමට අපහසු වසරක් වේ.රැකියාවක නිරත වන්නේ නම් ප්‍රධානින්ගේ දෝෂාරෝපණයන්ට ලක්විය හැකිය. රැකියා මාරුවීම් ලැබීමේ අවස්ථා වැඩිවන වසරකි. අන් අයගේ උපකාර වැඩියෙන් ලැබෙන වසරකි. දරුවන්ගේ උසස් අධ්‍යාපන වරම් හිමිවන වසරකි. මුත්‍රාශයේ රෝගාබාද, ලිංගික රෝගාබාද, හෘදය හා උදරය සම්බන්ධ රෝග ඇතිවිය හැකිය.
● සුබ අංක – බදාදා, සිකුරාදා
● සුබ අංක – 1, 5, 9
තුලා ලග්නය
දේපළ වාසි
තුලා ලග්නයෙන් උපන් ඔබගේ ලග්නාධිපති සිකුරු සෙනසුරු සමග පස් වැන්නේද බුධ දෙවැන්නේද ආදි ලෙස පිහිටමින් 2025 වර්ෂයේ ආරම්භය සිදුවනවා. මිල මුදල් ආදී ලාභ ලැබීම වෙනවා. එනමුත් බලාපොරොත්තු නොවූ වියදම් නිසා ආදායම් අඩුවනවා. ගෙදර දොර වියදම් වැඩි වෙන අවුරුද්දකි. ව්‍යාපාරවලින් පාඩු ලැබෙන වසරකි. වසරේ අග කාලය වන විට වෙළෙදාම්වලින් ලාභ ලැබිය හැකිය. පෞද්ගලික අංශයේ රැකියාවක නිරත වන්නේ නම් ඒ කටයුතු සාර්ථකව කළ හැකිය. මව්පිය පාර්ශ්වයෙන් දේපළ ලැබීමට අවස්ථා පවතී. තමන් සතුව පවතින දේ නැතිවීමේ අවදානමක් පවතිනවා. පවුලේ වැඩිහිටියකුට ජීවිත හානි ඇතිවන වසරකි. අලුත් ඇඳුම් පැළඳුම් ආභරණ ලැබෙන වසරකි. සහෝදරයන්ගෙන් හෝ අසල්වාසින්ගෙන් උදව් ලැබෙන කාලයකි.දරුවන්ගේ අධ්‍යාපන කටයුතු සාර්ථක වෙන විභාග කටයුතුවලින් ජය ලැබිය හැකි වසරකි. වාත, පිත සෙම් කිපිම් ඇතුළු සුළු රෝගාබාධයන් ඇතිවිය හැකිය.
● සුබ දවස් – සදුදා, බදාදා, සිකුරාදා
● සුබ අංක – 1, 6, 9
වෘශ්චික ලග්නය
නිශ්පල වියදම්
වෘශ්චික ලග්නයෙන් උපන් ඔබේ ලග්නාධිපති කුජ වක්‍ර වී නව වැන්නේද බුධ ලග්නයේද ආදි ලෙස පිහිටමින් 2025 වර්ෂය ආරම්භය වෙනවා. වසර මුල සිටම නිශ්ඵල වියදම් ඇතිවීම වෙනවා. මහන්සියෙන් මුදල් සෙව්වද ඒවා ඉක්මණින් වියදම් වීම සිදුවෙනවා. රැකී රක්ෂාවලට යහපත් නමුත් ඉතා මහන්සි වීමට සිදුවෙන වසරකි. නොයෙක් නොයෙක් දේවල් ගැන අලුත් අදහස් ඇතිවෙන වසරකි.
නමුත් ඒ අදහස් ක්‍රියාත්මක කිරීමෙන් වැළකීම සුදුසුය. තමා සිටින ස්ථානයේ හෝ රැකියාවේ වෙනස්කම් ඇතිවිය හැකිය. දේපළක් විකිණීමේ බලාපොරොත්තුවෙන් සිටී නම් එම දේපළ විකුණා විශාල මුදලක් ඉපයිය හැකිය. නමුත් එම මුදල් අරපිරිමැස්මෙන් භාවිත නොකළහොත් අලාභ සිදුවෙනවා. ඔබේ මව් පාර්ශ්වයේ ඥාතීන්ගෙන් යම් සිත් වේදනාවක් ඇති විය හැකිය. දරුවන්ගේ
කටයුතුවලට ඉතාම යහපත් වේ. ඉරුවාරදය, තොල් හා දිව ආශ්‍රිත රෝග ඇතිවිය හැකිය.
● සුබ දවස් – ඉරිදා, බ්‍රහස්පතින්දා
● සුබ අංක – 2, 5, 7
ධනු ලග්නය
වාහන ලාභ
ධනු ලග්නයෙන් උපන් ඔබගේ ලග්නාධිපති ගුරු වක්‍ර වී හය වැන්නේද රවි, සදු ලග්නයේද ආදි ලෙස පිහිටමින් 2025 වර්ෂයේ ආරම්භය සිදුවනවා. ඒ අනුව ඔබට වියදම් අධික කාලයක් පැමිණේ. නමුත් සුළු සුළු ලාභ ලැබිය හැකිය. උත්සාහවන්තව රැකියාව කළහොත් තරමක දියුණුවක් ලැබිය හැකියි.
රැකියාව කිරීමේදී උසස් නිලධාරීන් හා ආරවුල් ඇතිවිය හැකි නිසා කල්පනාවෙන් වැඩ කළ යුතුය. ඔබ විවාහක නම් සැමියා හෝ බිරිඳ සමග අමනාප වීම් ඇතිවීමට ඉඩ පවතී. යාන වාහන මිලදී ගැනීමේ වාසානාව හිමි වන වසරකි. වැඩිහිටියන්ගෙන් නෑදෑයන්ගෙන් උපකාර ලැබෙන වසරකි. වියපත් වූ අයෙක් නම් දරුවන්ගේ ආදරය සැලකිල්ල තවත් වැඩියෙන් ලැබෙන වසරක් වීමට ඉඩකඩ ඇත. දරුවන්ගේ අධ්‍යාපන කටයුතුවලට බාධා පැමිණීම වේ. ශරීර සෞඛ්‍ය දුර්වල වීම සිදුවීම වෙනවා. උදරාබාධ, අධි රුධිර පීඩනය, හෘදයාබාධ, ඇස් රෝග ආදී රෝග ඇතිවීමේ අවදානමක් පවතී.
● සුබ දවස් – ඉරිදා, බදාදා, සිකුරාදා
● සුබ අංක – 3, 5, 7, 8
මකර ලග්නය
ව්‍යාපාර ජය
මකර ලග්නයෙන් උපන් ඔබගේ ලග්නාධිපති සෙනෙසුරු, සිකුරු සමග ගෝචර වී දෙවැන්නේද ආදි ලෙස පිහිටමින් 2025 වර්ෂය ආරම්භ වේ. 2025 වර්ෂය ඔබට ධන ලාභ ලැබෙන වර්ෂයකි. වෙළෙද ව්‍යාපාරවලින් ලාභ ලැබේ. රැකියාවලින් උසස්වීම් ලැබේ. විනෝදයෙන් සැහැල්ලුවෙන් රැකියාව කිරීමට හැකියාව ලැබේ.
මංගල උත්සව ප්‍රියසම්භාෂණවලට සමබන්ධ වීමට අවස්ථාව හිමි වේ. අලුතින් විවාහ වූ අයෙක් නම් පවුල් ජීවිතයේ සතුට සාමදානය ඇතිවන වසරකි. දරුවන්ගේ අධ්‍යාපන කටයුතු ඉතාම සාර්ථක වන වසරකි. උදරාබාධ, බඩවැල් ආශ්‍රිත රෝග සෑදීමේ ඉඩකඩ පවතී.
● සුබ දවස් – බදාදා, සිකුරාදා, සෙනසුරාදා
● සුබ අංක – 2, 7, 9
කුම්භ ලග්නය
ආදර සම්බන්ධතා
කුම්භ ලග්නයෙන් උපන් ඔබගේ ලග්නාධිපති සෙනෙසුරු, සිකුරු සමග යෝග වී ලග්නයේද පිහිටමින් 2025 වර්ෂය ආරම්භ වේ. ලාභ ලැබුනද අනවශ්‍ය වියදම් ඇතිවන වසරක් වීමට ඉඩ පවතිනවා. රැකියා කරන්නන්ට රැකියාවෙන් ඉවත්වීමට හෝ රැකියාවේ ගැටලු ඇතිවීමේ අවදානමක් පවතින වසරකි.
ආදර සම්බන්ධතා ඇති කරගැනීමට හොඳ කාලයක් වන අතර විවාහය ප්‍රමාද වූ අයට ගැළපෙන සහකරුවන් හමුවෙන වසරකි. නින්දා අපහාස සිදුවිය හැකිය. දරුවන්ගේ අධ්‍යාපන කටයුතුවලට ප්‍රබල බාධා එල්ල විය හැක. දත් රෝග, හෘද රෝග, ලේ නහරවල රෝගාබාධ වැළදීමේ ඉඩකඩක් පවතී. එළැඹෙන වසර අපල සහිත වුවත් ආධ්‍යාත්මික කටයුතුවල යෙදීමෙන් මෙම අපල මගහරවා ගන්න පුළුවන්.
● සුබ දවස් – බ්‍රහස්පතින්දා, සෙනසුරාදා
● සුබ අංක – 1, 5, 7, 9
මීන ලග්නය
දරුවන්ගේ ජයග්‍රහන
මීන ලග්න හිමි ඔබගේ ලග්නාධිපති ගුරු, වක්‍ර වී තුන්වැන්නේද කුජ වක්‍ර වී තුන්වැන්නේද ආදි ලෙස පිහිටමින් වසර ආරම්භ වීම සිදුවුවද සෙනසුරු මීන රාශියට මාරුවීම නිසා බොහෝ වෙනස්කම් සිදුවන වසරකි. ධනහානි ඇතිවෙන වසරකි. රැකියා ස්ථානයේ තනතුරු අහිමිවීම්,රැකියාවේ ගැටලු ඇතිවිය හැක.
ව්‍යාපාරවලදී තරමක් ලාභ ලැබිය හැකි කාලයකි. ශරීරයේ වෙහෙස ඇතිකරන ගමන් බිමන් යෙදෙන කාලයකි.පදිංචියේ යම් වෙනසක් සිදුවිය හැකියි. කරගෙන යන කටයුතුවලට බාධා එල්ල වීම් සිදුවිය හැක. ඒ නිසා කල්පනාවෙන් වැඩකළ යුතුයි. පවුල් ජීවිතයේ කරදර ඇතිවෙන කාලයකි. දරුවන්ගේ අධ්‍යාපන කටයුතු සාර්ථකව කිරීමට අවස්ථාව උදාවෙනවා. දත්වල ආබාධ, උගුරේ අබාධ වැන ිරෝගාබාධ ඇතිවිය හැකිය.
● සුබ දවස් – බදාදා, බ්‍රහස්පතිනදා
● සුබ අංක – 1, 7, 8
ආධ්‍යාත්මවේදී බිසර චානක්‍ය මානගේ
පවනි දිලේකා
