අන්‍යයන්ගේ අවධානයට ලක් නොවී පහසුවෙන් යෙදිය හැකි මානසික තුළින් කාර්යාලයීය ආතතිය මගහරවා ගත හැකිය. ඔබ කාර්යාලයීය පුටුව යෝගා පැදුරක් ලෙසත්, වැඩ කරන කුටිරය සෙන් උද්‍යානයක් ලෙසත්, ඔබ යතුරු පුවරුව ආතතිය නැති කරන මෙවලම් කට්ටලයක් ලෙසත් සිතෙහි මවාගැනීම සන්සුන් හා ඵලදායී කාර්යාලයීය වටපිටාවක් ගොඩනැගීමේ පළමු පියවරයි. නින්දේදී මෙන් මොළය නැවත පණගැන්වීමක් අත්කර ගැනීමට මේ ක්‍රම අනුගමනය කරන්න.
ගැඹුරින් හුස්ම ගැනීම
ඔබේ පුටුවේ පහසුවෙන් වාඩිවී යටිපතුල් පොළවට සමාන්තරව ස්පර්ෂ වන සේ තබන්න. හතරට ගණන් කරන අතරේ බඩ පිම්බෙන සේ සෙමින් හුස්ම ගන්න. දැන් දෙකට ගණන් කරන තෙක් හුස්ම රඳවා ගන්න’ මෙය වාර 5-10 ගණනක් හෝ ඔබට පහසුවක් දැනෙන තෙක් සිදුකරන්න. ආතතියක් දැනෙන ඕනෑම අවස්ථාවකට මෙය සුදුසුය.
මාංශපේෂීන් ලිහිල් කිරීම
පාදවල ඇඟිලි තත්පර 05 ක් තද කරන්න. ඉන්පසු තත්පර 10 ක කාලයකදී ලිහිල් කරන්න. මෙසේ ක්‍රමයන් කලවා, තට්ටම් සහ උදරයේ මාංශපේෂී ලිහිල් කිරීම හා තදකිරීම කරමින් පපුව සහ පිටුපස දක්වා ඉදිරියට යන්න. ඉන්පසුව උරහිස සහ අත් වෙත ගමන් කර බෙල්ලේ සහ මුහුණේ මාංශපේෂීවලින් අවසන් කරන්න. ආතතිය සැලකිය යුතු ප්‍රමාණයකින් අඩුකර ගත හැකි මෙම අභ්‍යාසය සඳහා විනාඩි 50-10 අතර කාලයක් ප්‍රමාණවත්ය.
එකම ඉරියව්වකින් හිඳගෙන සිටීමේ අපහසුතාව
එකම ඉරියව්වකින් දිගු වේලා හිඳගෙන සිටීම නිසා ඇතිවන මාංශපේෂී සහ මානසික ආතතිය පහසුවෙන් මගහරවා ගත හැකිය. හිස හැරවෙන සේ ඔබ ගෙල දක්ෂිණාවර්තව සහ වාමාවර්තව සියුම් ලෙස කරකවන්න. ඉනික්බිතිව උරහිස් සෙමින් කන් දෙසට ඔසවා තත්පර කිහිපයක් තබා නිදහස් කරන්න. දැන් දෑත් ඉදිරියට දිගුකර මැණික් කටුව ඉහළට සහ පහළට නවන්න.
ඇඟිලි විහිදුවා හැර මිට මොළවා ගන්න. අවසාන වශයෙන් කොන්ද කෙළින් තබා වාඩිවී, ඔබ දකුණු අත පුටුවේ පිටුපසින් තබන්න. ඉන්පසු ඉණෙන් ඉහළ සහ ගෙලට පහළ කොටස මෘදු ලෙස දකුණු පසට අඹරවන්න. එසේ තබාගෙනම කිහිප වරක් හුස්ම ගන්න. ඉන්පසු එම ක්‍රියාවලියම වම් පසටත් සිදුකරන්න. මෙහිදී සිරුර ක්ෂණිකව ලිහිල් වෙයි.
සතිය පිහිටුවා ගැනීමේ භාවනාව
විනාඩි කිහිපයක් තුළදී ප්‍රබල ආතති සහනයක් ලබාදෙන මෙය නූතනයේ ජනප්‍රිය භාවනාවකි. සුවපහසු ලෙස පුටුවේ වාඩිවී හිඳ හැකිනම් දෑස් වසාගන්න. නාසයෙන් හුස්ම ඇතුළුවීම, පිටවීම එය පපුවට දැනෙන ආකාරය විඳිමින් හුස්ම ගැන අවධානය යොමුකරන්න. අවධානය කැඩෙන විට ඒවා ගැන විනිශ්චයකින් තොරව හුස්මගැනීම වෙත යොමුවෙන්න.
විනාඩි 2-5 අතර කාලයක් සුදුසුය. සිරුරේ විවිධ කොටස්වල අපහසුතාවයක් දැනෙන විට සතිය පිහිටුවා හුස්ම ගනිමින් ඒ ඒ තැන්වලට අවධානය යොමු කිරීමෙන් ශාරීරික හා මානසික පහසුවක් ලැබේ.ධනාත්මක චින්තනයෙන් සහනයක් “මම පහසුවෙන් සිටිමි, මගේ දෛනික වැඩ සාර්ථකයි” ආදී වශයෙන් සිතෙන් එම අවස්ථා මවා ගනිමින් ඒ තුළ නිතරම සිටීමෙන්ද ආතති කළමනාකරණය කර ජයග්‍රහණය ලබාගත හැකිය.
https://neurolaunch.com ඇසුරින්
සුනිල් අල්ගම ✍️
