මද්‍යසාර ගැනත් වැඩි උනන්දුවක් ඇති වීම සාමාන්‍ය තත්ත්වයක්. මද්‍යසාර නැති උත්සවයක් ගැන සමහර උදවියට හිතන්නත් අසීරුයි. මද්‍යසාර භාවිතය පිළිකාවට වඩත් සමීප හේතුවක් බැව් මෑතකදී සිදු කරන ලද අධ්‍යයනයන් මගින් පෙන්වා දී තිබෙනවා. මෙම අධ්‍යයන වාර්තාව “American Journal of Public Health” සඟරාව මගින් ප්‍රකාශයට පත් කර තිබෙනවා.
■ එහෙම වෙන්නේ ඇයි?
මද්‍යසාර මගින් පුද්ගලයාගේ සිරුරේ සිදු වෙන වෙනස්කම් නිසා පිළිකා සෛල ඉතාම ඉක්මනින් වර්ධනය වීමටත් හැකියාවක් තිබෙනවා. ඒ නිසා පිළිකාවට එරෙහිව ක්‍රියාත්මක ස්වභාවික සෛල ආරක්ෂිත රසායනයන් ( Retinoic Acide) ට පවා හානි සිදු වෙනවා. මද්‍යසාර භාවිතය නිසා අක්මාව, මුඛය, උගුර, ආහාර නාළ, ආහාර මාර්ගය ආශ්‍රිත පිළිකා ඇති වීමට වැඩි අවදානමක් තිබෙන බැව් දැන් ස්ථිර ලෙසින්ම හඳුනා ගෙන තිබෙනවා. ගුද මාර්ගයේ සහ මහ බඩවැල ආශ්‍රිත පිළිකා තත්ත්වයන් ඇති වීමටත් මත්පැන් සමීප හේතුවක් බැව් අමතක කළ යුතු නැහැ.
දිනකට මද්‍යසාර ඒකක 1.5 ක් වැනි ප්‍රමාණයක් පානය කිරීම නිසා සියලුම පිළිකා වර්ග වලින් ඇති වෙන මරණ සඳහා හේතු වෙනවා. එය 30 % ක් බැව් පර්යේෂකයන් විසින් පෙන්වා දෙනවා. මද්‍යසාර භාවිතය නිසා කාන්තාවන්ගේ පියයුරු පිළිකා ඇති වීමේ වැඩි අවදානමක්ද පවතින බැව් පර්යේෂකයන් විසින් පෙන්වා දී තිබෙනවා.
මද්‍යසාර නිසා කාන්තා සිරුරේ Oestrogen හෝර්මෝන මට්ටම ඉහළ යෑම පියයුරු පිළිකාවට හේතුවක් බවත් තහවුරු වී තිබෙනවා. ඒ නිසා මද්‍යසාර භාවිතය අඩු කිරීම මගින් පිළිකා ඇති වීමේ අවදානමත් සැලකිය යුතු මට්ටමකින් අඩු කර ගත හැකි බවත් පර්යේෂකයන්ගේ අදහසයි.
මද්‍යසාර භාවිතය නිසා ඇති වෙන Acetaldehyde විෂ රසායනය මගින් පුද්ගලයාගේ සිරුරේ DNA ජානයට හානි සිදු වෙනවා. ඒ නිසා මිනිස් සිරුරේ හානියට පත් වෙන සෛල නැවත ප්‍රතිසංස්කරණයක් වීම සිදු වෙන්නේ නැහැ.ඒ තත්ත්වය පිළිකාවක් ඇති වීමේ මූලික සාධකය බව කාටත් නොතේරෙන කරුණක්.
■ මත්පැන් පානය කරනවා නම්
ඔබ මත්පැන් පානය කරනවා නම් දුම්පානයෙන් සම්පූර්ණයෙන්ම දුරස් වෙන්න. ඒ වගේම දිනකට විනාඩි 30 ක් හෝ ව්‍යායාමයන්හි නිරත වෙන්න. ආහාර පාලනයන් සමග නිවරැදි ශරීර ස්කන්ධ දර්ශකයක් පවත්වා ගැනීම ගැනත් වැඩි අවධානයක් දක්වන්න.
( www.drinkaware.co.uk ඇසුරෙන්)
■ පුන්‍යා චාන්දනී ද සිල්වා
