මූල්‍යමය කටයුතු එහෙම නැතිනම් ජීවිතේ මුදල් සම්බන්ධ දේවල් ගැන කිසිම ගැටලුවක් ඇතිකරගන්නෙ නැතුව ජීවත් වෙන්න නම් එක්කෝ කෙනෙක් මල්ටිමිලියන කෙනෙක් වෙන්න ඕන. එහෙම නැතිනම් අල්පේච්ඡ ජීවිතයක් ගෙවන, අතිශයින්ම සරල මනුස්සයෙක් වෙන්න ඕන.
හැබැයි ඉතින් ඔය දෙකටම අයිති නොවෙන, මධ්‍යම පන්තියෙ අපට මූල්‍යමය කටයුතු ඔළුව කැක්කුමක් නොකර ජීවත් වෙන්න වෙන වෙන ක්‍රම හොයාගන්න වෙනවා. එතනින් මූලිකම කාරණාවක් තමයි මූල්‍යමය කටයුතු හරි හැටි කළමනාකරණය කරන එක.
බජට් කරගමු
ගොඩක් දෙනෙක්ට කරන්න කිව්වට කරන්නෙ නැති, කළොත් මාසෙකින් දෙකකින් අත ඇරලා දාන, හැබැයි කරන්න පුළුවන් නම් සෑහෙන්න වටින දෙයක්. මාසේ මුලම මාසේ වියදම් සහ ආදායම් බජට් එක හදන්නයි තියෙන්නෙ. මුලින්ම මාසේ එන්න තියෙන ආදායම් ටික ලැයිස්තුගත කරනවා. ඊළඟට මාසේ තියෙන අත්‍යාවශ්‍ය සහ අවශ්‍ය වියදම් ලැයිස්තු ගත කරනවා. දැන් වියදම් පැත්ත ආදායම්වලට වඩා වැඩි නම් කරන්න තියෙන්නේ වියදම් කපන එක. බිල්,කෑම වගේ අත්‍යාවශ්‍ය වියදම් කපන්න බැහැනේ. ඒ නිසා හිතල බලල අනවශ්‍ය වියදම් කපලා අයින් කරන්න ඕන.
මාසේ බිල්
අපට මාසයේ බිල් එන්නෙ එකම දවසකදී නෙවෙයිනේ. හැබැයි අපි මාසේ බිල්වලට අමතර ගණන් එකතු නොවෙන විදියට, එක දවසක් ගෙවන්න තියාගන්න එක තමයි වාසි. හැබැයි මේ දවස තීරණය කරගන්න නම් තමන්ට ගෙවන්න තියෙන බිල් හැම එකකම Billing Cycle එක දැනගන්න වෙනවා. ඊට පස්සේ එක දවසකදී ගෙවන්න. ඒ වගේම පුළුවන් තරම් උත්සාහ කරන්න මාසේ බිල්වල ගණන් නොවෙනස්ව පවත්වා ගන්න. ඒ කියන්නෙ ටෙලිෆෝන් බිල අද දාහක් වෙලා ලබන මාසේ තුන් දාහක් වෙනවා කියන්නේ ප්‍රශ්නයක්. අන්න ඒ නිසා ඒ ගැන වැඩියෙන් හිතන්න වෙනවා.
කෑෂ් ද, කාඩ් ද, ඉලෙක්ට්‍රොනික් කෑෂ් ද?
දැන් කාලේ ගොඩක් දෙනෙක් මුදල් භවිතයට වඩා කාඩ් පාවිච්චියට මුල් තැනක් දීලා තියෙන්නේ. ඒක හොඳ දෙයක්. හැබැයි ඔය කාඩ් කියන්නේ ක්‍රෙඩිට් කාඩ් නම් ඒකට වෙනමම විනයක් තියෙන්න ඕන. හැබැයි කෑෂ් සහ කාඩ්වලටත් වඩා දැන් කාලේ හොඳම දෙයක් තමයි ඉලෙක්ට්‍රොනික් කෑෂ් හෙවත් ඊ වොලට් එකක් පාවිච්චි කරන එක. මේකෙන් තමන්ගේ සියලුම බිල්, විනාඩි පහක් දහයක් ඇතුළතදී ගෙදර ඉඳලම ගෙවන්නත් පුළුවන් වෙනවා. ඒ වගේම අතේ සල්ලි ගෙනියන එකත් අඩු වෙනවා.
කාඩ් මැනේජ්මන්ට්
මේක බොහොම බැරෑරුම් කාරණාවක්. ක්‍රෙඩිට් කාඩ් කියන්නේ ගොඩක් දෙනෙක් වරද්ද ගන්න තැනක්. ක්‍රෙඩිට් කාඩ් එකක් හරි විනයකින්, හරි කළමනාකරණයකින් පාවිච්චි නොකළොත් මුළු ජීවිතයම විනාශ වෙලා ණය කරායෙක් වෙලා තමයි නතර වෙන්නෙ. හැබැයි හරියට ක්‍රෙඩිට් කාඩ් පාවිච්චි කරන එක වාසිත් ඇතුවම නෙමෙයි.
මෙතනදීත් ප්‍රධානතම දේ වෙන්නේ ක්‍රෙඩිට් කාඩ් එක පාවිච්චි කරන එක අර මාසේ බජට් එකට අනුව කරන එක.දැන් ගොඩක් දෙනෙක්ට තියෙන ප්‍රශ්නයක් තමයි ක්‍රෙඩිට් කාඩ් අරගෙන, ඒකෙන් වියදම් කරලා, පොලී හැදිලා ගෙවා ගන්න බැරුව ඉන්න එක. කරන්න තියෙන්නේ මෙච්චරයි. පුළුවන් නම් කාඩ්වල ණය එක කාඩ් එකකට ගේන්න පුළුවන්. ඊට පස්සේ කාඩ්වලට මාසිකව ප්‍රමාණවත් ගාණක් පියවන්න හදාගන්න පුළුවන්.
ස්මාට් බෑන්කින්
ඉස්සර තමයි බැංකු කටයුතුවලට බැංකුවට ඇවිදගෙන ගිහින්, කවුන්ටර්වල පැය ගණන් රස්තියාදු වුණේ. දැන් සල්ලි ගන්න වගේම සල්ලි දාන්නත් ටෙලර් මැෂින් තියෙනවා. හැබැයි ඒකටත් බැංකුවට යන්න ඕනනේ. ආන්න ඒ නිසා අපිට පුළුවන් ඔන්ලයින් බෑන්කින්වලට රෙජිස්ටර් වෙන්න. කිසි කරදරයක් නෑ, කම්පියුටර් එක ඉස්සරහා ඉඳලම බැංකු කටයුතු ඉවර කරගන්න පුළුවන්. ඒ වගේම තවත් සාර්ථක ක්‍රමයක් තමයි ස්මාට් බෑන්කින්. ඒ කියන්නෙ ස්මාට්ෆෝන් එකේ තියෙන බැංකු ඇප් හරහා සියලුම බැංකු කටයුතු ඉෂ්ඨ කරගන්න එක.
ණයට මුල් තැන
ණය කියන්නේ ඉස්සර නම් මිනිස්සු හරියට බය වෙන දෙයක්. හැබැයි අද කාලේ ණයට බය වෙන්න එපා. මොකද අද කාලේ හැටියට අපිට ණය වෙන්නෙ නැතුව බැහැ. ගෙවල් ණය, බැංකු ණය වගේ එක ණයක් හෝ දෙකක්, සාමාන්‍ය මනුස්සයෙක්ගේ ජීවිතේ තියෙනවාම තමයි. එතකොට ක්‍රෙඩිට් කාඩ් එකක් ගන්නවා කියන්නේම ණයක් ගන්නවා කියන එක. දැන් ණයට බය නොවුණා කියලා මදි.
ණය හරියට කළමනාකරණය කරන්න ඕන. ඒ කියන්නේ ණයට අමතර පොලී එකතු නොවෙන විදියට ගෙවලා දාන්න ක්‍රමයක් තියෙන්න ඕන. එතකොට ණය ගන්න කලින්ම ඒ සැලසුම හදාගන්න ඕන. ණය ගත්තට පස්සේ ඒක යන්නේ අත්‍යාවශ්‍ය වියදම්වලට කියන එකත් මතක තියාගන්න ඕන. එතකොට අනවශ්‍ය ණය නැති නිසා ගෙවල් ණය ඒ මාසේ හරි වෙලාවට ගෙවන්න වෙනවා කියන එකත් මතක තියාගන්න ඕන.
දවසේ මූල්‍ය කටයුතුවලට විනාඩි පහක්
මේක ඇත්තටම උඩ කිව්ව මාසෙකට සැරයක් හදන බජට් එකේ, දිනපතා කරන්න තියෙන කොටසක් විදියට හිතන්න පුළුවන්. තමන්ගෙ දවසෙන් විනාඩි පහක් කියන්නේ ලොකු දෙයක් නෙවෙයිනේ. මේ විනාඩි පහේ කරන්න ඕන, කලින් දවසේ මූල්‍යමය කටයුතු සමාලෝචනය කිරීම සහ අද දවසේ මූල්‍යමය කටයුතු සැලසුම් කිරීම.
ඒ කියන්නේ කලින් දවසේ මොකක් හරි අනපේක්ෂිත අමතර වියදමක් කරන්න වුණා නම්, අද දවසේ මූල්‍යමය කටයුතුවලදී ඒ අමතර වියදම කවර් කරගන්න පුළුවන්ද කියලා බලන්න පුළුවන්. දවසේ තමන් අතේ තියෙන සල්ලි කොහාටද යන්නේ කියන එක ගැන දැනුවත් වෙන්න පුළුවන්. තමන් අර මාසේ හදපු බජට් එකේ විදියටම වැඩේ කරගෙන යනවද කියන එක ඩබල් චෙක් කරන්නත් පුළුවන්.
15% ඉතුරු කරමු
ගොඩක් පොහොසත් කියලා හිතන ඇමරිකාව වගේ රටවල පවා මිනිස්සු ජීවත් වෙන්නේ මාසේ පඩියෙන් කියලා කියනවා. ඒ කියන්නේ මේ මාසේ පඩියට පස්සේ ඊළඟ මාසේ පඩිය එනකල් බලාගෙන ඉන්න වෙනවා. බැරිවෙලාවත් එක මාසයක් වැඩ කරන්න බැරි වුණොත් මුළු ජීවිතයම කඩන් වැටෙනවා. ආන්න ඒ නිසා තමයි ඔය ඉතුරුම් සහ ආයෝජනවල වාසිය ගන්න අවශ්‍ය වෙන්නේ. අන්න ඒ නිසා අපට උත්සාහ කරන්න වෙනවා මාසෙකට අඩු තරමින් ආදායමින් 15% ක් වත් ඉතුරු කරන්න.
සමහර වෙලාවට ණයවලට හිර වෙලා නම් ඔය වගේ ගාණක් වෙන් කරන්න බැරි වෙන්න පුළුවන්. හැබැයි එහෙමනම් කරන්න තියෙන්නේ හැකි ඉක්මනින් අමතර ණය ඉවර කරලා මාසෙකට වැඩි ගාණක් අතට හොයාගන්න පුළුවන් ක්‍රමයක් ගැන හොයා බලලා 15% ක් කොහොම හරි ඉතුරු කරන්න ක්‍රමයක් හදාගන්න එක. ඉතුරු කළාට මදි. ඒක ආයෝජනය කරන්නත් ඕන නුවණැති විදියට.
( අන්තර්ජාලය ඇසුරෙන් )
අර්චිත ඉඳුවර
