මේෂ ලග්නය
උසස් කෙනෙකුගේ පිහිට
මෙම වර්ෂය ඔබට කලකින් පසුව උදා වන සුභ ප්‍රතිඵල ලබා දෙන වර්ෂයකි. ගේ, දොර, වතුපිටි වැඩිදියුණුව ලැබෙන කාලයකි. සමිති සමාගම්වල ප්‍රමුඛතාවය ලැබේ. කථිකත්වය වැඩිදියුණු වේ. ආගිය තැන මූලිකත්වය, නායකත්වය ලැබේ.
තම කීර්ති නාමය ප්‍රචලිත වේ. දුරස් වී සිටි නෑයින් සොයා යයි. තමාට වඩා උසස් කෙනෙකුගේ පිහිට ලැබේ. තම සහකරුට හෝ සහකාරියට අපකීර්තිය ඇති වේ. සොර සතුරු පීඩා මෙන්ම හිතේ බියගති ඇති වේ. විදෙස් ගතවීමට උත්සාහ ගන්න. තරඟ විභාග ජය මතු වේ. ශරීර සුවතාවය ඇති වේ.
සුභ දවස් – ඉරිදා, අඟහරුවාදා
ශුභ අංකය – 01, 07
සුභ වර්ණය – රතු
වෘෂභ ලග්නය
විදෙස් ගතවීමේ භාග්‍යය
සුභ අසුභ මිශ්‍ර වර්ෂයකි. වර්ෂයේ මැද දක්වා ධනයට එතරම් යහපත් නොවේ. වර්ෂයේ මැද භාගයෙන් පසුව ගේ දොර වතුපිටි ධනලාභ යෙදේ. වසර පුරා විදෙස් ගතවීමේ භාග්‍යය යෙදේ. වැදගත් වැඩකටයුතු ටික කාලයකට කල් දැමිය යුතු කාලයකි.
පියාට අපල යෙදේ. බොහෝ කලක සිට කරගෙන ආ කටයුතුවල ප්‍රතිඵල ලැබේ. පාප මිත්‍රයන්ගෙන් ඈත්වන්න. ලේ සම්බන්ධ පරීක්ෂණ සිදු කරගත යුතු කාලයකි. පවුලේ අය සමගම පැරණි බෝධියක් අසල එක් දිනක් සිල් සමාදන්වීම සිදු කරන්න.
සුභ දවස් -සිකුරාදා, ඉරිදා
සුභ අංකය – අංක:6
සුභ වර්ණය – සුදු, කහ
මිථුන ලග්නය
සල්ලි ලැබුණත් අධික වියදම්
සුභ අසුභ මිශ්‍ර වසරකි. ධනය ලැබේ. අධික ලෙස වියදම් වේ. සුළු වශයෙන් හෝ ගෘහ කර්මාන්තයක් ආරම්භ කළ යුතු වසරකි. විදේශ ගත වීමට ඉතාම ශුභයි. රැකියා ස්ථානවල හෝ තනතුරුවල වෙනසක් වේ. අසල්වාසීන් හෝ රැකියාවේ සමීප හිතවතුන් අතේ දුරින් තබා ගත යුතු වසරකි. තමන්ට වඩා පහත් අයගෙන් චිත්ත පීඩා සිදු වේ. ගෙදර සැපපහසුවට බාධා පැමිණේ. හදිසි ප්‍රේම සම්බන්ධතා ගොඩනැගේ.
සමාජයේ උසස් පිළිගැනීමක් ලැබේ. විදෙස් අධ්‍යාපනය හෝ විදෙස් රැකියා සඳහා විවර වේ. උත්සාහවන්තව කටයුතු කළ යුතු යුගයකි. පාදවල හා කොන්දේ අමාරු ඇතිවිය හැක. පොහෝ දිනක පෙහෙවස් සමාදන් වී සිටින උපාසක, උපාසිකාවන්ට ඖෂධ පාන සංග්‍රහ කරන්න.
සුභ දවස් – සිකුරාදා, බදාදා
සුභ අංකය – 3, 5
සුභ වර්ණය – කොල, කහ
කටක ලග්නය
විදෙස්ගත වීමට ඉතා ශුභයි
මෙම වර්ෂය සුභ අසුභ මිශ්‍ර ඵල ගෙනදේ. වෙළඳ ව්‍යාපාරිකයන්ගේ වියදම් පක්ෂය ඉහළ යයි. රැකියා කටයුතුවල බාධා පැමිණේ. විදෙස්ගත වීමට ඉතා ශුභය. දුරදිග නොබලා කටයුතු නොකළහොත් සිතේ සහනය අහෝසි වේ. වැදගත් තීරණ ගැනීමේදී පවුලේ අය සමග සහයෝගයෙන් එකමුතුව කටයුතු කරන්න.
ගෘහ කර්මාන්ත, වගා කටයුතු සඳහා වඩාත් ශුභ වේ. පින් දහම් ආදියට වඩාත් නැඹුරු වේ. ආහාරපාන ආදිය භාවිතයේදී ඉතා ප්‍රවේශම් වියයුතු කාලයකි. සහකරු හෝ සහකාරිය මුල් කරගෙන ගෘහ කටයුතු සිදුකළ යුතුය. අතරමං වී සිටින සුනඛයෙකු හෝ පූසෙකු රැගෙන ගොස් හදාවඩා ගැනීම, සිර කරගෙන සිටින සතුන් නිදහස් කිරීම තුළින් වඩා යහපත් ප්‍රතිඵල ගෙන දේ.
සුභ දවස් – ඉරිදා, බ්‍රහස්පතින්දා
සුභ අංකය – 2,9
සුභ වර්ණය – සුදු
සිංහ ලග්නය
පරිස්සමෙන් කතාකරන්න
මෙම වර්ෂය මිශ්‍ර ඵල ගෙන දෙන වසරකි. වියදම් අධික වේ. සොර සතුරු උවදුරු ඇති වේ. ආගමික වතාවත්වලට වඩාත් නැඹුරු විය යුතු වසරකි. රැකියා කටයුතුවලට බාධා පැමිණේ. පවුලේ ඥාතීන් සමග මිත්‍රශීලීව කටයුතු කළයුතු කාලයකි. නිතරව සිත පිරිසිදුව තබාගත යුතු කාලයකි.
ආශ්‍රයට අලුත් හිත මිතුරන් පැමිනුණත් ඔවුන්ගෙන් ප්‍රවේශම් විය යුතුය. වචන භාවිත කිරීමේදී ප්‍රවේශම් විය යුතුය. අනුන්ගේ දියුණුව උදෙසා කටයුතු කිරීමට සිදුවේ. විදෙස් අධ්‍යාපනය සඳහා විදෙස් ගත අයෙකුගේ උපකාර ලැබේ. ඇස්වල හෝ මුහුණේ රෝග මතුවේ. වියලි ආහාර පුලන්නන්ට පරිත්‍යාග කිරීමෙන් වඩාත් සුභ ඵල ගෙනදේ.
සුභ දවස් – බදාදා, සිකුරාදා
සුභ අංකය – 4, 1
සුභ වර්ණය – රතු
කන්‍යා ලග්න
යන යන තැන ජය
ඉතා සුභ වර්ෂයකි. ආර්ථික ප්‍රශ්න දුරුවේ. නව කර්මාන්ත ව්‍යාපාර ආරම්භ කළහොත් ඉහළ ධනයක් උපයා ගත හැකි වේ. යන යන තැන ජය ලැබේ. සිතට ගතට සැනසිල්ල උදාවේ. සමාජීය පිළිගැනීම ඇති වේ. යහපත් සේවකයන් හිමිවේ. සහකරුට හෝ සහකාරියට දියුණුව උදාවේ. යහපත් ප්‍රේම සම්බන්ධතා උදා වේ. ආගමික නායකවරුන්ගෙන් ඵල ප්‍රයෝජන ලැබේ.
ගේ දොර කලඑලි වේ. තම සහෝදර සහෝදරියන්ට සැප ලැබේ. ඈත් වී සිටි සහෝදරියක් තමන්ට ඵල ප්‍රයෝජන ලැබෙන ආකාරයට තමා සොයා පැමිණේ. වසරේ මැද භාගයෙන් පසු උසස් අධ්‍යාපනයෙන් පසු විදෙස් ගතවීම ඉතාම සුදුසුය. නිවසේ තැනක් පිළියෙල කර සතුන්ට ආහාර දැමීමෙන් ප්‍රතිඵල වඩාත් වර්ධනය කර ගත හැකිය. කොන්ද ආශ්‍රිත ආබාධ, සමේ රෝග, ලේ නහර සම්බන්ධ රෝගවලින් ප්‍රවේශම් විය යුතුය.
සුභ දවස් – සිකුරාදා, බදාදා
සුභ අංකය – 3, 7
සුභ වර්ණය – කොල
තුලා ලග්න
සිර වී තිබූ ධනය නැවත ලැබේ
සුභඵල ගෙන දෙනු ලබන වර්ෂයක් වේ. නව කර්මාන්ත ව්‍යාපාරවලින් ප්‍රතිඵල ලැබේ. මෙතෙක් සිර වී තිබූ ධනය නැවත ලැබේ. රැකියා උසස්වීම් ලැබේ. ස්ත්‍රීන් සමඟ ප්‍රිය සම්භාෂණ හිත මිතුරුකම් වර්ධන වේ.
ගේ දොර වතුපිටි මිල මුදල් හිමි වේ. සහකරු හෝ සහකාරිය සමග හිත මිතුරුකම් වැඩි වේ. උසස් යැයි සම්මත හිත මිතුරන් ඇසුරට පැමිණේ. කීර්තිය ඔප්නැංවේ.වර්ෂයේ මැද භාගයෙන් පසුව සුභඵල යම්තාක් දුරට අඩුවේ. පවුලේ ඥාතීන් සමඟ මතභේද ගොඩ නැගේ. හදිසි අනතුරුවලින් ප්‍රවේසම් විය යුතු කාලයකි. පදිංචි ස්ථාන මාරු නොකළ යුතුය. විදෙස් අධ්‍යාපනයට ඉතාම ශුභයි. වගා කටයුතු ආරම්භ කළ යුතුය. නාභියෙන් පහල ප්‍රදේශයේ රෝග සහ බෝවන රෝගවලින් ප්‍රවේශම් විය යුතුය.
සුභ දවස් – සිකුරාදා, අඟහරුවාදා
සුභ අංකය – 6
සුභ වර්ණය – සුදු, ක්‍රීම්
වෘශ්චික ලග්නය
පවුලේ කෙනෙකුට ධන සම්පතක්
සුභ අසුභ මිශ්‍ර වර්ෂයකි. වියදම් පාලනය කර ගත යුතුය. රැකියාවේ චිත්ත පීඩා ඇතිවීමට ඉඩ ඇත. වෙල හෙළදාම්වලට සුභය. නරක මිනිසුන් ඇසුරට පැමිණේ. නීතිමය ප්‍රශ්නවලින් ඈත් වී සිටිය යුතුය. මවුට හෝ මව් පාර්ශවයේ ඥාතියෙකුට තදබල අපලයක් යෙදේ. කේන්තිය පාලනය කරගත යුතු කාලයකි. අනියම් ප්‍රේම සම්බන්ධතා නිසා කීර්ති නාමයට හානි පැමිණේ. විදෙස් ගතවීමට තිබු අදහසක් සපල වේ.
පවුලේ කෙනෙකුට ධන සම්පතක් ලැබේ. දියණියක් සිටී නම් ඒ දියණිය තුලින් ජීවිතය කලඑළි වේ. ඇඳුම් පැලඳුම් රූපලාවණ්‍ය උපකරණ වැනි දේ සම්බන්ධ ව්‍යාපාර දියුණු වේ. උගුර, කන, නාසය සම්බන්ධ අසනීප, වාත රෝග වැනි අසනීප සාදයි. යාන වාහන මිලදී ගැනීම සඳහා මිල මුදල් නොයෙදිය යුතු කාලයකි. ඉඩකඩම් මිලදී ගැනීමට යහපත්ය.
සුභ දවස් – ඉරිදා, බ්‍රහස්පතින්දා
සුභ අංකය – 1, 7
සුභ වර්ණය – රතු
ධනු ලග්නය
උසස් කළණ මිතුරන් ඇසුරට
මෙම වර්ෂය ඔබට ඉමහත් ප්‍රතිඵල ගෙන දෙන වර්ෂයකි. ධනයට ශුභයි. ස්ව උත්සාහයෙන් කරන රැකියා දියුණු වේ. මාසික වේතනය ලබන රැකියාවලට වඩා ගෘහ කර්මාන්තවලින් වැඩි දියුණුවක් ඇති වේ. උසස් අයගෙන් කීර්ති ප්‍රශංසා ලැබේ. සහන මිලට දේපල වස්තුව මිලට ගත හැකි වේ. නිවාස ඉදිකිරීමට ද ශුභයි. පහසුකම් සහිත වාසස්ථාන හිමි වේ. ප්‍රේම සම්බන්ධතා වැඩිදියුණු වේ.
උසස් කළණ මිතුරන් ඇසුරට පැමිණේ. ඔවුන්ගෙන් විපුල ඵල ප්‍රයෝජන ලැබේ. සතුරන් පරාජය වේ. විභාගවලින් ජය ලැබේ. විදෙස් අධ්‍යාපනයේදි ජය ලැබේ. ආරණ්‍යගත මහසඟරුවනට අෂ්ඨ පරිෂ්කාර පූජා කිරීම, ඖෂධ පානවර්ග පූජා කිරීම, ගැබිනි මාතාවන්ට කිරි ආශ්‍රිත ආහාර පාන පරිත්‍යාග තුලින් මහත් ගුණ ලැබේ.
සුභ දවස් – බදාදා, සිකුරාදා
සුභ අංකය – 3, 5
සුභ වර්ණය – කහ
මකර ලග්නය
ගේ දොර වස්තු ලාභ ලැබේ
මෙම වර්ෂය ඔබට මහත් සුභ ඵල ගෙනදෙන වසරකි. ගේ දොර වස්තු ලාභ ලැබේ. ආදායම වැඩිවේ. රැකියාවේ දියුණුව ඇති වේ. ස්වයං ව්‍යාපාරිකයන්ට වසරේ මැද භාගයේදී දියුණු වේ. විශේෂයෙන් අධ්‍යාපනය සම්බන්ධ ව්‍යාපාර කරන අයට වඩාත් සුභ වේ. යුක්ති ගරුක දෙයින් ධනය ලැබේ. විදෙස් ගතවීමට මග සැලසේ. වෙනත් භාෂාවන් ඉගෙන ගැනීමට උදවු ලැබේ. සමාජ සේවා කටයුතුවලට සුභ කාලයකි. සමාජයෙන් හොඳ ගෞරවයක් හිමිවේ. හිතවතුන් හිතවතියන් ගෙන් ධෛර්යයද, උනන්දුව ද සහයෝගය ද නිරතුරුව ලැබේ. රාගාධික වේ. එවැනි අය ආශ්‍රයට පැමිණේ. තරඟ, විභාග, ලොතරැයිවලින් ජය ලැබේ. ශරීර සෞඛ්‍යයට යහපත් වේ. එහෙත් එක් ඇසක දුර්වලතාවයක් මතු වේ. බලු, කපුටු දාන දීම, ඇලේ දොලේ සිටින මාළුන්ට කෑම දැමීමෙන් සෙත සැලසේ.
සුභ දවස් – අඟහරුවාදා, සිකුරාදා
සුභ අංකය – 6, 9
සුභ වර්ණය – නිල්
කුම්භ ලග්න
සිත නොවෙනස්ව තබා ගතයුතු කාලයකි
සුභ අසුභ මිශ්‍ර වසරකි. ලැබෙන ධනය ආරක්ෂා කර ගත යුතුයි. රැකියාව රැකගැනීමට උත්සුක විය යුතුයි. සැපපහසුව ගැන නොසොයා ධෛර්යයෙන් වැඩ කළ යුතුයි. ප්‍රේම සම්බන්ධතාවලට බාධා ඇති වේ. හදිසි අනතුරුවලින් ප්‍රවේසම් විය යුතුයි. තම සිත නොවෙනස්ව තබා ගතයුතු කාලයකි. නීතිමය ප්‍රශ්නවලට ඉදිරිපත් නොවිය යුතුයි.
කිහිප වතාවක් බාධා වීමෙන් අනතුරුව තම කටයුතු ඉටු වේ. කලක් තිස්සේ ඇසුරු කළ හිත මිතුරන්ගේ ගතිගුණ වහා වෙනස් වේ. පුලන්නන්ට වියලි ආහාර පරිත්‍යාග කිරීම ද සිරකරගෙන සිටින සතුන් නිදහස් කිරීම ද වැඩිහිටි මව්පිය යුවලකට දිනයක් යොදා ගෙන ස්නානය කරවා සංග්‍රහ සත්කාර කිරීම ද අපල විපත් දුරු වී සහනය සැලසීමට හේතු වේ.
සුභ දවස් – බ්‍රහස්පතින්දා, සිකුරාදා
සුභ අංකය – 8, 9
සුභ වර්ණය – රතු, නිල්
මීන ලග්නය
වරින් වර ධනය
වරින් වර ධනය මෙම වර්ෂය ඔබට සුභඵල ගෙන දෙනු ලබන වර්ෂයක් වේ. වරින් වර ධනය ලැබීම් ඇති වේ. කලින් යොදවන ලබන මුදල්වල ප්‍රතිලාභ හිමි වේ. ලැබෙන මුදල් ස්ථාවර වත්කම්වලට යොමු කර ගත යුතුය. ව්‍යාපාර ආරම්භ කිරීමට මුල් මාස 6 වඩාත් සුභයි. නීතිමය කටයුතුවලින් ප්‍රවේසම් විය යුතුය. ගෞරවය ආරක්ෂා කරගත යුතුය. ඉවසීමෙන් සිටිය යුතු කාලයකි. අඹු දරුවන් සමඟ සහයෝගයෙන් කටයුතු කළ යුතුය.
මිතුරු වේෂයෙන් පැමිණෙන සතුරන්ගෙන් ප්‍රවේසම් විය යුතුය. තිබෙන ප්‍රේම සම්බන්ධතා කැඩී ගොස් නව සම්බන්ධතා ගොඩ නැගේ. පොත්පත් හා අධ්‍යාපන මාර්ගවල යෙදෙන අයට ඉතා සුභයි. යටි බඩේ රෝග, අමාශගත රෝග, සමේ රෝග මතු වේ. ආහාර පිණිස අල්ලාගෙන සිටින මසුන් නැවත ජලයට මුදා හැරීම, රුවන්වැලි සෑය අභියස පෙහෙවස් සමාදන් වීම තුළින් අපල දුරු වී දියුණුව ඇති වේ.
සුභ දවස් – බ්‍රහස්පතින්දා, අඟහරුවාදා
සුභ අංකය – 9, 3
සුභ වර්ණය – කහ
ජ්‍යෙතිෂ්‍ය විශාරද කීර්ති ශ්‍රී
දේශාභිමානී
ප්‍රවීණ ජ්‍යෙතිර්වේදී
අජිත් ලොකුගේ
ධම්මික හේවාවසම් ✍️
